మే 9న ‘క‌ల్కి’ రావాలి. అయితే ప్ర‌స్తుతం ఉన్న ప‌రిస్థితుల్లో… అది సాధ్యం కాక‌పోవొచ్చు. ఎందుకంటే ఏపీలో అదే స‌మ‌యంలో ఎల‌క్ష‌న్ ఫీవ‌ర్ మ‌రింత జోరుగా ఉండ‌బోతోంది. అందుకే క‌ల్కికి కొత్త రిలీజ్ డేట్ కావాలి. ఈ విష‌య‌మై చిత్ర‌బృందం చాలారోజులుగా మ‌ల్ల‌గుల్లాలు ప‌డుతోంది. మ‌రో అనువైన విడుద‌ల తేదీ చూసుకొనే ప్ర‌య‌త్నాల్లో బిజీగా ఉంది. చివ‌రికి ఓ రిలీజ్ డేట్ ఫిక్స్ చేసుకొన్న‌ట్టు తెలుస్తోంది. మే 30న ఈ చిత్రాన్ని విడుద‌ల చేయ‌బోతున్నార‌ని స‌మాచారం. రేపు ఉగాది సంద‌ర్భంగా రిలీజ్ డేట్ ని చిత్ర‌బృందం అధికారికంగా ప్ర‌క‌టించ‌బోతోంది. ఈ సంద‌ర్భంగా కొత్త పోస్ట‌ర్ కూడా విడుద‌ల చేయ‌నుంది.

ప్ర‌భాస్ – నాగ అశ్విన్ కాంబోలో రూపుదిద్దుకొంటున్న సినిమా ఇది. ఇప్ప‌టికే షూటింగ్ దాదాపుగా పూర్తి కావొచ్చింది. నిర్మాణానంత‌ర ప‌నులు కూడా జోరుగా సాగుతున్నాయి. ప్ర‌మోషన్ కార్య‌క్ర‌మాల్ని కూడా మెల్ల‌గా మొద‌లెట్టే ఆలోచ‌న‌లో ఉంది చిత్ర‌బృందం. ఉగాదిన‌ రిలీజ్ డేట్ ఎనౌన్స్‌మెంట్ తోనే ప్ర‌చార ప‌ర్వాన్ని షురూ చేస్తారు. పాట‌లూ, ప్రోమోలూ మెల్ల‌మెల్ల‌గా విడుద‌ల చేస్తారు. యానిమేష‌న్ రూపంలో ప్ర‌తీ పాత్ర‌నీ విడి విడిగా ప‌రిచ‌యం చేయాల‌న్న ఆలోచ‌న‌లో ఉంది చిత్ర‌బృందం. ఈ యానిమేష‌న్ వీడియోలు నేరుగా ఓటీటీలోనే విడుద‌ల కానున్నాయ‌ని స‌మాచారం. అందుకుగానూ నెట్ ఫ్లిక్స్ తో బేరం కూడా కుదిరింద‌ట‌. అమితాబ్ బ‌చ్చ‌న్‌, క‌మ‌ల్ హాస‌న్‌, దీపికా ప‌దుకొణె.. వీళ్లంతా ఈ సినిమాలో కీల‌క పాత్ర‌ల్లో క‌నిపించ‌నున్నారు. అతిథి పాత్ర‌ల్లో ఏడెనిమిదిమంది న‌టీన‌టులు త‌ళుక్కున మెర‌వ‌బోతున్నారు. అందులో రాజ‌మౌళి, రాంగోపాల్ వ‌ర్మ లాంటి హేమాహేమీలు ఉన్నారు.