స్టార్ హీరోతో ఓ హిట్ కొడితే ఇక ఆ దర్శకుడిని వదిలిపెట్టే ఆలోచన చేయరు హీరోలు. ఈ సంవత్సరం సంక్రాంతికి సోగ్గాడే చిన్ని నాయనా అంటూ వచ్చి సూపర్ హిట్ అందుకున్న దర్శకుడు కళ్యాణ్ కృష్ణ దర్శకత్వంలో నాగ చైతన్య హీరోగా ఓ సినిమా కమిట్ అయిన సంగతి తెలిసిందే. ఈ నెల 22 అనగా రేపు శుక్రవారం ఈ సినిమాకు ముహుర్తం పెట్టనున్నారట చిత్రయూనిట్. అన్నపూర్ణ స్టూడియోలో ఈ కార్యక్రమం జరుగనున్నదట.
ఈ సినిమాలో మరోసారి సమంతతో రొమాన్స్ చేస్తున్నాడు నాగ చైతన్య. ఏమాయ చేసావెతో హిట్ పెయిర్ గా సందడి చేస్తున్న ఈ ఇద్దరు ఆటోనగర్ సూర్య, మనం సినిమాల్లో అలరించారు. వీరిద్దరి కెమిస్ట్రీ బాగా వర్క్ అవుట్ అవుతుందనే కారణం చేత సినిమాలో సమంతను హీరోయిన్ గా తీసుకున్నారు. ఇక ఈ సినిమాను అన్నపూర్ణ స్టూడియోస్ బ్యానర్లో అక్కినేని నాగార్జున నిర్మిస్తుండటం విశేషం. మరి కెరియర్ లో సూపర్ హిట్ కోసం తపిస్తున్న నాగ చైతన్యకు సోగ్గాడి డైరక్టర్ అయినా మంచి హిట్ అందిస్తాడేమో చూడాలి.
