సినిమా కంటే ప్ర‌చారం ముందుగా మొద‌లైపోతున్న రోజులివి.  క్లాప్ కొట్ట‌కముందే, జ‌నాలు సినిమా గురించి మాట్లాడుకోవాలంటే ఏదో కొత్తగా ప్ర‌య‌త్నించాల్సిందే. క‌మల్ హాస‌న్ ఇప్పుడు అదే చేస్తున్నాడు. ఖైదీ ద‌ర్శ‌కుడు లోకేష్ క‌న‌క‌రాజ్ ద‌ర్శక‌త్వంలో క‌మ‌ల్ హీరోగా ఓ సినిమా తెర‌కెక్క‌బోతోంది. దీనికి నిర్మాత క‌మ‌ల్ హాస‌నే. షూటింగ్ ఇంకా మొద‌లు కాలేదు. అయితే.. ఈలోగానే టీజ‌ర్ వచ్చేస్తోంది.

న‌వంబ‌రు 7..క‌మ‌ల్ పుట్టిన రోజు. ఈ సంద‌ర్భంగా ఈ చిత్రానికి సంబంధించిన టీజ‌ర్ వ‌ద‌ల‌బోతున్నారు. సినిమా మొద‌ల‌వ్వ‌క‌ముందే టీజ‌ర్ ఎలా అనుకుంటున్నారా?  ఈ సినిమాకి సంబంధించి ఓ ట్రైల్ షూట్ జ‌రిగింది. అందులో టీజ‌ర్‌కి కావ‌ల్సిన షాట్స్ తీసి పెట్టుకున్నాడు ద‌ర్శ‌కుడు. దాన్నే ఇప్పుడు విడుద‌ల చేస్తున్నార‌న్న‌మాట‌. నిజానికి ఈ పుట్టిన‌రోజున క‌మ‌ల్ – భార‌తీయుడు 2 టీజ‌ర్ వ‌స్తుందేమో అనుకున్నారు. ఆ సినిమా కొంత మేర షూటింగ్ జ‌రుపుకుంది. కానీ.. ఇప్పుడు ముందుకా, వెన‌క్కా.. అనే సందేహంలో, సందిగ్థంలో ప‌డింది. ఇలాంటి స‌మ‌యంలో.. టీజ‌ర్ ఎందుకు వ‌దులుతారు?  ఆ స్థానంలోనే..కమ‌ల్ త‌న కొత్త సినిమా టీజ‌ర్‌ని చూపించి, ఫ్యాన్స్ ని ఖుషీ చేయ‌బోతున్నాడంతే.