1996లో విడుద‌లైన `భార‌తీయుడు` సినిమాకు ఇప్పుడు సీక్వెల్ సిద్ధ‌మ‌వుతోన్న సంగ‌తి తెలిసిందే. శంక‌ర్ కెరీర్లో భార‌తీయుడు చిత్రానికి ఉన్న ఇంపార్టెన్స్ ని ప్ర‌త్యేకంగా చెప్ప‌క్క‌ర్లేదు. తండ్రీ కొడుకుల పాత్ర‌లో క‌మ‌ల్ న‌ట‌న, త‌ల్లిగా సుక‌న్య‌, రెహ‌మాన్ పాట‌లు అన్నీ క‌లిపి అప్ప‌ట్లో భార‌తీయుడు సినిమాను ఏ రేంజ్ హిట్ చేశాయో తెలిసిందే. ఆ మ్యాజిక్‌ను అలాగే ఇప్పుడు సీక్వెల్‌లోనూ చూపించాల‌ని శంక‌ర్ ప్ర‌య‌త్నాలు చేస్తున్నారు. అయితే సెట్లు స‌రిగా రాలేదని, మేక‌ప్ సెట్ కాలేద‌ని ఆయ‌న కొన్నాళ్లు భార‌తీయుడు 2 సినిమాకు బ్రేక్ ఇచ్చార‌ని ఈ మ‌ధ్య వార్త‌లు వ‌చ్చాయి. అయితే అవ‌న్నీ వ‌ట్టి పుకార్లేన‌ని కొట్టిపారేశారు క‌మ‌ల్‌హాస‌న్‌. “నేను ఇప్పుడు కూడా షూటింగ్‌కి వెళ్లే వ‌స్త‌న్నాను. మేక‌ప్ విష‌యంలోనూ, సెట్స్ విష‌యంలోనూ అస‌లు ప్రాబ్ల‌మ్ ఏమీ లేదు. మేక‌ప్ చాలా బాగా వ‌స్తోంది. త్వ‌ర‌లోనే మేం చేస్తున్న ప‌ని గురించి ప్రేక్ష‌కుల‌కు చిన్న‌గా ఓ అంశాన్ని చూపించాల‌నుకుంటున్నాం“ అని అన్నారు. కాల్షీట్ల‌ను బ‌ట్టి శ‌భాష్ నాయుడు, క్ష‌త్రియపుత్రుడు2 సినిమాల‌ను కూడా వ‌రుస‌గా పూర్తి చేయాల‌ని అనుకుంటున్న‌ట్టు ఆయ‌న తెలిపారు. సో భార‌తీయుడు2కి అంతా క్లియ‌ర్‌గానే ఉంద‌న్న‌మాట‌.