ఈనెల 14న బాక్సాఫీసు ముందుకు వ‌స్తోంది కంగువా. సూర్య క‌థానాయ‌కుడిగా న‌టించిన ఈ చిత్రానికి శివ ద‌ర్శకుడు. సూర్య కెరీర్‌లోనే భారీ బ‌డ్జెట్ తో రూపొందించిన చిత్ర‌మిది. పాన్ ఇండియా స్థాయిలో విడుద‌ల చేస్తున్నారు. ప్ర‌మోష‌న్లు పీక్స్‌లో ఉన్నాయి. ఇటీవ‌ల హైద‌రాబాద్ లో ప్రీ రిలీజ్ ఫంక్ష‌న్ చేశారు. రాజ‌మౌళి, బోయ‌పాటి శ్రీ‌ను, విశ్వ‌క్‌సేన్‌, సిద్దు జొన్న‌ల‌గ‌డ్డ‌… ఇలా స్టార్లంతా క‌లిసొచ్చారు. ఇప్పుడు తాజాగా `కంగువా` రిలీజ్ ట్రైల‌ర్ విడుద‌ల చేశారు.

కంగువా రెండు కాలాల నేప‌థ్యంలో సాగే క‌థ‌. సూర్య పాత్ర రెండు గెట‌ప్పుల్లో సాగ‌నుంది. ఇప్ప‌టి వ‌ర‌కూ.. ట్రైబ‌ల్ నేప‌థ్యంలో వ‌చ్చే స‌న్నివేశాలే ఎలివేట్ చేశారు. ఈ కొత్త ట్రైల‌ర్‌లో… వంద‌ల ఏళ్ల క్రితం జ‌రిగిన క‌థ‌ని ఈ కాలానికి ముడి పెట్టారు. సూర్య రెండు గెట‌ప్పులూ ఆక‌ట్టుకొన్నాయి. చివ‌ర్లో రోలెక్స్ ని గుర్తు చేస్తూ ఓ లుక్ క‌నిపించింది. అయితే… ఆ గెట‌ప్ ఈ సినిమాలో ఎంత వ‌ర‌కూ ఉంటుందో చూడాలి. విజువ‌ల్స్ ఎప్ప‌టిలా అదిరిపోయాయి. యాక్ష‌న్ కి పెద్ద పీట వేశారు. ‘ఎదిరిస్తాం.. ఎదురు ఇస్తాం’ అనే డైలాగ్ సూర్య నోటి నుంచి వినిపించింది. దేవిశ్రీ ప్ర‌సాద్ అందించిన బ్యాక్ గ్రౌండ్ స్కోర్‌, విజువ‌ల్ ఎఫెక్ట్స్ ఆక‌ట్టుకొన్నాయి. థియేట‌ర్లో విజువ‌ల్ ఎక్స్‌పీరియ‌న్స్ ఇచ్చే సినిమాల‌కు ఈత‌రం ప్రేక్ష‌కులు పెద్ద పీట వేస్తున్నారు. కాన్వాస్ ఎంత పెద్ద‌దైతే, అన్ని గొప్ప వ‌సూళ్లు ద‌క్కుతున్నాయి. ఈ సినిమా రూ.2 వేల కోట్ల మార్క్ చేరుకుంటుంద‌ని నిర్మాత జ్ఞాన‌వేల్ జోస్యం చెప్పారు. త‌మిళంలో ఇప్ప‌టి వ‌ర‌కూ రూ.1000 కోట్ల సినిమానే రాలేదు. మ‌రి.. ఆ మ్యాజిక్ మార్క్‌ని ఈ సినిమా అందుకొంటుందో లేదో చూడాలి.