షాహిద్ కపూర్ తో రేపో మాపో పెళ్లని అందరూ అనుకుంటున్న సమయంలో హటాత్తుగా సైఫ్ అలీ ఖాన్ ను పెళ్లాడిన క్యూట్ లేడీ కరీనా కపూర్ సినిమాల్లో ఇంకా సత్తా చాటుతూనే ఉంది. గ్లామర్ తారగా, మంచి నటిగా మూవీ జర్నీ సాఫీగా సాగిపోతుంది. కరీనా లేటెస్ట్ మూవీ కి అండ్ కా. ఇందులో మిస్టర్ పెళ్లాంగా నటిస్తుందట. భర్త ఇంట్లో కూర్చుంటే ఉద్యోగం చేసి భారీగా సంపాదించే భార్య పాత్రను కరీనా పోషిస్తోంది. నిజ జీవితంతో మొగుడూ పెళ్లాం ఇద్దరూ బాగానే సంపాదిస్తున్నారు. కొత్త సినిమాలో మాత్రం భర్త (అర్జున్ కపూర్) ఇంట్లో కూర్చుని వంట చేసి భార్యకు వడ్డిస్తుంటాడట.
ఆ మధ్య రాజేంద్ర ప్రసాద్ హీరోగా వచ్చిన మిస్టర్ పెళ్లాంలో ఆమని పాత్ర లాంటిదే కరీనా పోషిస్తుందన్న మాట. అయితే ఇది ఆ సినిమా రీమేకా కాదా అనేది మాత్రం దర్శక నిర్మాతలు చెప్పడం లేదు. కాబట్టి రీమేక్ కాకపోవచ్చంటున్నారు.
కి అండ్ కా సినిమాలో అమితాబ్ బచ్చన్, జయా బచ్చన్ కూడా నటిస్తున్నారట. ఆర్ బాల్కీ స్వయంగా సబ్జెక్టును రెడీ చేసుకుని దర్శకత్వం వహిస్తున్నారు. దీనికి ఇళయ రాజా సంగీతాన్ని అందించడం ఒక విశేషం. ఇది ఒక రొమాంటిక్ కామెడీ మూవీగా తెరకెక్కుతోందట. ఈ సినిమా షూటింగ్ మొన్న ఆగస్టులో మొదలైంది. రిలీజ్ డేట్ మాత్రం యూనిట్ వారు ఇంకా ప్రకటించలేదు. మొత్తానికి కరీనాకు ఓ డిఫరెంట్ పాత్ర లభించిందని బాలీవుడ్ జనాలు చెప్పుకొంటున్నారు.
