హిట్టు, ఫ్లాపుల‌తో సంబంధం లేకుండా కార్తికేయ కెరీర్ మంచి స్పీడుతో దూసుకుపోతోంది. గీతా ఆర్ట్స్ లో కార్తికేయ హీరోగా ఓ సినిమా తెర‌కెక్కుతోంది. `చావు క‌బురు చ‌ల్ల‌గా` అనే టైటిల్ ఖ‌రారు చేశారు. ఇప్పుడు త‌మిళ చిత్ర‌సీమ నుంచి కూడా పిలుపొచ్చింది. అజిత్‌కి విల‌న్‌గా కార్తికేయ న‌టించ‌బోతున్నాడు. అజిత్ – శివ కాంబినేష‌న్‌లో ఓ సినిమా తెర‌కెక్కుతోంది. ఇందులో ప్ర‌తినాయ‌కుడి పాత్ర కోసం చాలా అన్వేష‌ణ జ‌రిగింది. చివ‌రికి కార్తికేయ‌ని ఎంచుకున్నారు. గ్యాంగ్ లీడ‌ర్‌లో కార్తికేయ విల‌న్‌గా న‌టించిన సంగ‌తి తెలిసిందే. ఆ సినిమా స‌రైన ఫ‌లితాన్ని ఇవ్వ‌లేదు గానీ, కార్తికేయ త‌న న‌ట‌న‌తో ఓకే అనిపించాడు. అజిత్ సినిమాని తెలుగులోనూ బాగా మార్కెట్ చేయాల‌న్న‌ది చిత్ర‌బృంద ఆలోచ‌న‌. అందుకే మ‌రో మాట లేకుండా కార్తికేయ‌ని విల‌న్‌గా ఎంచుకున్నారు. ప్ర‌స్తుతం హైద‌రాబాద్‌లోని రామోజీ ఫిల్మ్‌సిటీలో అజిత్ సినిమా షూటింగ్ జ‌రుగుతోంది. మ‌రి కార్తికేయ సెట్లో ఎప్పుడు అడుగుపెడ‌తాడో చూడాలి.