ఈ ఆదివారం బిగ్ బాస్ 4 సెట్లో సంద‌డి చేసింది స‌మంత. మావ నాగార్జున లేని లోటుని… త‌న న‌వ్వుల‌తో, త‌న స్క్రీన్ ప్రెజెన్స్‌తో భ‌ర్తీ చేయ‌గ‌లిగింది. ఈ షోలో.. కార్తికేయ కూడా త‌న ఆట – పాట‌తో ఆక‌ట్టుకున్నాడు. అఖిల్ కూడా మెరిశాడు. వీట‌న్నింటికీ హైప‌ర్ ఆది పంచ్‌లు తోడై.. మొత్తానికి సండే ఎపిసోడ్ స్పెష‌ల్‌గా మారిపోయింది.
ఈ వారం దేవి బిగ్ బాస్ హౌస్ నుంచి బ‌య‌ట‌కు వెళ్లిపోయింది. దేవిని సాగ‌నంపేట‌ప్పుడు కార్తికేయ స్టేజ్‌పైనే ఉన్నాడు. ఈ సంద‌ర్భంలో స‌మంత.. కార్తికేయ‌ని `దేవికి నీ సినిమాలో ఛాన్స్ ఇవ్వాలి` అంటూ అభ్య‌ర్థించాలి. దానికి కార్తికేయ పాజిటీవ్ గా స్పందించాడు. `దేవి మ‌హేష్ సినిమాలోనే న‌టించింది క‌దా. నా సినిమాలో త‌ప్ప‌కుండా ఇస్తా` అని మాటిచ్చేశాడు. అంతేకాదు… స‌మంత‌కు కర్చీఫ్ కూడా వేశాడు. `దేవిని నా సినిమాలో తీసుకోమ‌న్నారు క‌దా. నాదో రిక్వెస్ట్. మీరు నాతో పాటు న‌టిస్తారా` అంటూ స‌మంత‌కు కర్చీఫ్ వేసేశాడు. దానికి స‌మంత కూడా ఓకే అనేసింది. `దేవి, నువ్వు, నేనూ క‌లిసి న‌టిద్దాం` అని మాటిచ్చింది. అయితే.. ఇలాంటి షోల‌లో మాట ఇచ్చిపుచ్చుకోవ‌డం మామాలే. ఇవ‌న్నీ ఫార్మ‌లాలిటీకి జ‌రుగుతుంటాయి. కాక‌పోతే.. చిత్ర‌సీమ‌లో ఏదైనా జ‌ర‌గొచ్చు. రేపు.. స‌మంత, కార్తికేయ క‌లిసి ఓ సినిమాలో న‌టిస్తే, ఆశ్చ‌ర్య‌పోవాల్సిన అవ‌స‌ర‌మే లేదు.
