న‌టుడు, సినీ విమ‌ర్శ‌కుడు, ర‌చ‌యిత‌, ద‌ర్శ‌కుడు క‌త్తి మ‌హేష్ క‌న్నుమూశారు. ఇటీవ‌ల రోడ్డు ప్ర‌మాదంలో క‌త్తి మ‌హేష్ తీవ్రంగా గాయ‌ప‌డిన సంగ‌తి తెలిసిందే. గ‌త కొద్ది రోజులుగా చెన్నైలోని అపోలో ఆసుప‌త్రిలో చికిత్స పొందుతున్న క‌త్తిమ‌హేష్ కొద్దిసేప‌టి క్రితం తుది శ్వాస విడిచారు. రెండు వారాల క్రితం నెల్లూరు ద‌గ్గ‌ర జ‌రిగిన రోడ్డు ప్ర‌మాదంలో క‌త్తిమ‌హేష్‌కి తీవ్ర గాయాల‌య్యాయి. ఈ ప్ర‌మాదంలో ఆయ‌న కంటి చూపు కోల్పోయార‌ని వార్త‌లొచ్చాయి. అయితే… క‌త్తిమ‌హేష్ కోలుకుంటున్నారని, ఆయ‌న త్వ‌ర‌లోనే సంపూర్ణ ఆరోగ్యంతో బ‌య‌ట‌కు వ‌స్తార‌ని స‌న్నిహితులు చెబుతూ వ‌చ్చారు. కొద్ది రోజులుగా క‌త్తి మ‌హేష్ ఆరోగ్యం గురించి ఎలాంటి అప్ డేట్ బ‌య‌ట‌కు రావ‌డం లేదు. దాంతో క‌త్తిమ‌హేష్ ఆరోగ్యం కుదుట‌ప‌డింద‌ని అనుకున్నారంతా. అంత‌లోనే… ఇప్పుడు మ‌ర‌ణ‌వార్త వినాల్సివ‌చ్చింది. విమ‌ర్శ‌కుడిగా చిత్ర‌సీమ‌లో అడుగుపెట్టిన క‌త్తి మ‌హేష్ `పెస‌రెట్టు` సినిమాతో ద‌ర్శ‌కుడిగా మారారు. కొన్ని చిత్రాల్లోనూ న‌టించారు. ప‌వ‌న్ వ్య‌క్తిగ‌త జీవితంపై ఆయ‌న చేసిన కొన్ని వ్యాఖ్య‌లు విమర్శ‌ల‌కు దారి తీశాయి. హిందుత్వంపై, రాముడిపై క‌త్తి చేసిన వ్యాఖ్య‌లు అప్ప‌ట్లో ఓ సంచ‌ల‌నం. బిగ్ బాస్ లోనూ అడుగుపెట్టిన మ‌హేష్‌… త‌న‌కంటూ ఓ అభిమాన వ‌ర్గాన్ని సృష్టించుకున్నారు. వైకాపా మ‌ద్ద‌తుదారుడిగానూ ఆ పార్టీ త‌ర‌పున మాట్లాడారు.