కేసీఆర్ బీహార్ పర్యటన పై పూర్తి స్థాయిలో నెగెటివ్ ప్రచారం జరుగుతోంది. బీహార్ కు వెళ్లి బీహార్ వాళ్లకు సాయం చేయడం తప్ప.. రాజకీయంగా సాధించాలనుకున్న మైలేజీలో ఒక్క శాతం సాధించకపోగా.. నితీష్ కుమార్ దెబ్బకు కేసీఆర్‌పై దేశ స్థాయిలో ట్రోలింగ్ జరుగుతోంది. దీనికి కారణం ప్రెస్మీట్లో నితీష్ కుమార్ వ్యవహిరంచిన తీరే. విపక్ష కూటమికి మోదీని నాయకుడిగా ప్రతిపాదిస్తారా అని ఓ మీడియా ప్రతినిధి అడిగిన ప్రశ్నకు కేసీఆర్ సూటిగా సమాధానం చెప్పలేదు. ఆ సమయంలోనే నితీష్ కుమార్ లేచి నిలబడ్డారు.
ఇక చాలు వెళదామని జర్నలిస్టులకు సైగ చేశారు. అయితే కేసీఆర్ మాత్రం ప్రత్యేకంగా విజ్ఞప్తి చేసి చేయి పట్టి కూర్చోబెట్టారు. కానీ కొన్ని సెకన్లకే మళ్లీ నితీష్ కుమార్ లేచివెళ్లారు. అదే ప్రెస్మీట్లో నితీష్ కుమార్ మాట్లాడలేదు. బీజేపీపై కలిసి పోరాడదామని చెప్పలేదు. అందుకే ఈ వీడియోను ఇతర పార్టీల నేతలు విపరీతంగా వైరల్ చేస్తున్నారు. కలసి కూర్చోలేని వారు కలసి పోరాటం ఎలా చేస్తారని ప్రశ్నిస్తున్నారు. బీజేపీ నేతలు… కేసీఆర్‌ను ఎద్దేవా చేస్తున్నారు.
ఆయన ను చూసి ఉత్తరాదిలో నవ్వుకుంటున్నారని అంటున్నారు. తెలంగాణ ప్రజల సొమ్మును రాజకీయం కోసం ఇతర రాష్ట్రాల్లో పంచుతున్నారని.. కానీ అక్కడ ఎవరూ కేసీఆర్ ను గొప్పగా చూడటం లేదని.. రాజకీయం కోసమే అలా చేస్తున్నారని అంటున్నారు.కేసీఆర్ తమది ధర్డ్ ఫ్రంట్ కాదు.. మెయిన్ ఫ్రంట్ అని చెప్పినా ఇరువురి మధ్య అండస్టాండింగ్ మాత్రం రాలేదు. తాము కేసీఆర్‌తో కలిసి పనిచేస్తామని నితీష్ కుమార్ చెప్పలేదు. అంటే కేసీఆర్‌కు వ్రతం చెడింది.. ఫలితమూ దక్కలేదన్న అభిప్రాయం వినిపిస్తోంది.
