జగన్ ప్రభుత్వం కాకుండా వేరే ఏ ప్రభుత్వం ఉన్నా సరే….ఆ ప్రభుత్వాన్ని బంగాళాఖాతంలో కలిపేయండి అని చెప్పడం జగన్‌కి బాగా అలవాటు. రాజకీయాల్లో ఉన్న ప్రతి నాయకుడికీ కూడా కొన్ని ఊతపదాలు ఉన్నట్టే….‘బంగాళా ఖాతంలో కలిపేయండి’ అన్న డైలాగ్‌ జగన్‌కి ఊతపదం. ఆ మధ్య కిరణ్ కుమార్‌రెడ్డి ప్రభుత్వాన్ని బంగాళాఖాతంలో కలిపేయండి అని చెప్తూ ఊరూవాడా తిరగాడు. తీరా చూస్తే జనాలు కిరణ్ కుమార్‌రెడ్డి ప్రభుత్వాన్ని, కాంగ్రెస్ పార్టీని నిజంగానే బంగాళాఖాతంలో కలిపేశారు కానీ జగన్‌కి షాక్ ఇస్తూ చంద్రబాబును నెత్తినపెట్టుకున్నారు. ఆ షాక్ నుంచి వెంటనే తేరుకున్న జగన్….చంద్రబాబు సిఎం అయిన తర్వాత నుంచీ చంద్రబాబు ప్రభుత్వాన్ని బంగాళాఖాతంలో కలిపెయ్యండి అంటూ పాట పాడడం మొదలెట్టాడు.

ఈ మధ్య తను చేసిన కొన్ని వ్యాఖ్యలతోనూ, కేశినేని ట్రావెల్స్‌తోనూ చంద్రబాబుకు తలనొప్పి తెప్పించిన కేశినేని నాని ఇప్పుడు బాబును ఖుషీ చేసే పనిలో పడ్డాడు. అందులో భాగంగా జగన్‌ని తిట్టడం మొదలెట్టాడు. ఊరూ పేరు…ముక్కు మొహం తెలియని వాళ్ళైనా సరే….జగన్‌ని తిడితే బాబుకు అదో ఆనందం. అందుకే ఇప్పుడు కేశినేని నాని బాబు కళ్ళలో ఆనందం చూడడం కోసం జగన్‌ని తిట్టడం మొదలెట్టాడు. అందులో భాగంగానే ‘జగన్‌ని బంగాళాఖాతంలో కలిపెయ్యండి’ అని ఆవేశంగా మాట్లాడేశాడు కేశినేని నాని. టిడిపి నేతలు ఇప్పటి వరకూ జగన్‌ని తిట్టిన తిట్లన్నింటిలో హైలైట్స్ తీస్తే ఈ ‘జగన్‌ని బంగాళాఖాతంలో కలిపెయ్యండి’ అన్న డైలాగ్ కూడా అందులో ఒకటిగా ఉంటుంది అనడంలో సందేహం లేదు. అసలే నెక్ట్స్ ఎన్నికల్లో బాబు విజయవాడ ఎంపి సీటు ఇస్తాడా? ఇవ్వడా? అని బోలెడంత ఆందోళన చెందుతున్న కేశినేని నానికి జగన్‌పై తిట్ల వర్షం తర్వాతనైనా బాబు నుంచి ఆ హామీ దక్కుతుందేమో చూడాలి మరి.