యూత్ ఫుల్ క‌థ‌ల‌తో ప్రేక్ష‌కుల్ని ఆక‌ట్టుకొంటున్నాడు కిర‌ణ్ అబ్బ‌వ‌రం. త‌న చేతి నిండా సినిమాలే. అందులో ఓ చిత్రానికి ‘క’ అనే వెరైటీ టైటిల్ పెట్టారు. ఇంగ్లీష్ లో ‘KA’. అంటే కిర‌ణ్ అబ్బ‌వ‌రంకు షార్ట్ క‌ట్ అనుకోవాలేమో..?! కాకపోతే ఈ ‘క’కి క‌థ‌తో మంచి లింక్ ఉన్న‌ట్టే క‌నిపిస్తోంది. ఈరోజు ఈ టైటిల్ ని చిత్ర‌బృందం అధికారికంగా ప్ర‌క‌టించింది. సుజిత్‌, సందీప్ అనే ఇద్ద‌రు ద‌ర్శ‌కులు ఈ సినిమాతో ప‌రిచ‌యం అవుతున్నారు. చింతా గోపాల్ కృష్ణారెడ్డి నిర్మాత. ఈ సంద‌ర్భంగా టైటిల్ తో పాటు ప్రీ లుక్ పోస్ట‌ర్ కూడా విడుద‌ల చేశారు.
కిరణ్‌ని పూర్తి స్థాయిలో రివీల్ చేయ‌లేదు కానీ, బ్యాక్ గ్రౌండ్ లో కిర‌ణ్ ని చూస్తే.. క‌చ్చితంగా ఈసారి అవ‌తారం కొత్త‌గా ఉండ‌బోతోంద‌ని అనిపిస్తోంది. శ్యామ్ సి ఈ చిత్రానికి సంగీతాన్ని స‌మ‌కూరుస్తున్నారు. ప్రేక్ష‌కుల్ని ఓస‌రికొత్త ప్ర‌పంచంలోకి తీసుకెళ్లే క‌థ ఇద‌ని, పాత్ర‌లు, వాటి తీరు తెన్నులూ షాకింగ్ గా ఉంటాయ‌ని చిత్ర‌బృందం చెబుతోంది. కిర‌ణ్ అబ్బ‌వ‌రం న‌టించిన ‘దిల్ రూబా’ విడుద‌ల స‌న్నాహాల్లో ఉంది. ఆ సినిమా విడుద‌ల‌య్యాకే.. ‘క’ ప్రేక్ష‌కుల ముందుకు వ‌స్తుంది. ఈ చిత్రానికి సంబంధించిన పూర్తి వివ‌రాలు త్వ‌ర‌లో చిత్ర‌బృంద‌మే స్వ‌యంగా వెల్ల‌డించ‌నుంది.
