తెలంగాణ ప్రభుత్వం అత్యంత విలువైన కోకాపేట భూముల్ని వేలం వేసింది. రేటు కూడా అత్యధికంగా పలికింది. కోకాపేటలో 49.9 ఎకరాలు హెచ్‌ఎండీఏ వేలం వేసింది. గరిష్టంగా ఒక ఎకరాకు రూ.60.2 కోట్ల ధర పలికింది. రూ.31.2 కోట్లకు అత్యల్ప ధరకు హైమా డెవలపర్స్‌ ప్రైవేట్‌ లిమిటెడ్‌ ఎకరం భూమి కొనుగోలు చేసిది. వేలంపాటలో అత్యధిక ధర పెట్టిన కొనుగోలు చేసిన కంపెనీ ఆక్వా స్పేస్ డెవెలపర్స్ ప్రైవేట్ లిమిటెడ్. ఈ సంస్థ పదహారున్నర ఎకరాలను సొంతం చేసుకుంది. తర్వాత స్థానంలో రాజపుష్ప రియల్ ఎస్టేట్ కంపెనీ ఉంది. సత్యనారాయణరెడ్డి మన్నె దాదాపుగా ఎనిమిది ఎకరాలు సొంతం చేసుకున్నారు.

ప్రెస్టిజ్ ఎస్టేట్స్ ప్రాజెక్ట్స్ లిమిటెడ్ కంపెనీ ఏడున్నర ఎకరాలు.. ఇక శ్రీ చైతన్యకు చెందిన వర్సిటీ ఎడ్యుకేషన్ మేనేజ్ మెంట్ ప్రైవేట్ లిమిటెడ్ ఏడున్నర ఎకరాలు కొనుగోలు చేసింది. హైమా డెవలపర్స్ ప్రైవేట్ లిమిటెడ్ ఎకరం స్థలాన్ని దక్కించుకుంది. దాదాపుగా పదిహేడు ఎకరాలు కొన్న అక్వా స్పేస్ సంస్థ మైహోం గ్రూప్‌నకు చెందినది. ఎకరం కొన్న హైమా డెవలపర్స్ కూడా వారిదే. ఇక వ్యక్తిగత హోదాలో భూములు కొన్న సత్యనారాయణరెడ్డి మన్నె ..ఎంఎస్ఎన్ ఫార్మా కంపెనీ యజమాని. ఆయన కుటుంబసభ్యుడు టీఆర్ఎస్ ఎంపీగా ఉన్నారు. మొత్తంగా చూస్తే.. ఒకరిద్దరు తప్ప.. టీఆర్ఎస్ ప్రభుత్వంతో సన్నిహితంగా ఉండేవారికే భూములు దక్కాయి. అయితే.. ఇందులో అక్రమాలు జరిగినట్లుగా ఎలాంటి ఆరోపణలు రాలేదు. పెద్ద మొత్తంలోనే భూములపై రేట్లు వచ్చాయి.

ఎకరం అరవై కోట్లకుపైగావచ్చాయి. ఒక్క రోజులోనే నాలుగు వందల కోట్ల ఆదాయం వచ్చింది. భూముల వేలం పాట కొనసాగనుంది. మొత్తంగా ఐదు వేల కోట్లను ప్రభుత్వం లక్ష్యంగా పెట్టుకుంది. కొనుక్కునేవారు ప్రభుత్వ పెద‌్దల సన్నిహితులే అయినా… పద్దతిగా కొనుక్కుంటున్నారన్న అభిప్రాయం ఉంది. అయితే విమర్శలు మాత్రం సహజంగానే వస్తూంటాయి. శుక్రవారం ఖానామెట్‌లో వున్న 15 ఎకరాల భూమిని వేలం వేయనున్నారు. వీటిని కూడా మైహోంగ్రూప్‌నే అత్యధికంగా దక్కించుకునే అవకాశం ఉంది.