తెలంగాణ కాంగ్రెస్ ఎమ్మెల్యే రాజగోపాల్ రెడ్డి ఒక రోజు కాంగ్రెస్ పార్టీకి..మరో రోజు బీజేపీకి తన వాయిస్ అప్పగిస్తున్నారు. అసెంబ్లీ ఎన్నికల మొదటి రోజు.. సీఎల్పీలో హడావుడి చేసిన కోమటిరెడ్డి రాజగోపాల్ రెడ్డి.. రెండో రోజు బీజేపీ తరపున వకాల్తా పుచ్చుకున్నారు. టీఆర్ఎస్‌ను ఓడించేది బీజేపీనేనని మళ్లీ స్టేట్ మెంట్ ఇచ్చారు. అంతే కాదు.. బీజేపీలోకి రమ్మని సంప్రదింపులు జరుగుతున్నాయని.. నాగార్జునసాగర్‌ నుంచి పోటీ చేయాలని.. కొన్నిరోజులుగా బీజేపీ నేతలు అడుగుతున్నారని చెప్పుకొచ్చారు. పోటీపై ఇంకా ఎలాంటి నిర్ణయం తీసుకోలేదని .. తాను బీజేపీ నుంచి పోటీచేస్తే జానారెడ్డికి మూడో స్థానమే వస్తుందని జోస్యం చెప్పారు. సాగర్‌లో బీజేపీ బలమైన అభ్యర్థి కోసం వెదుకుతోంది.
కానీ… ఇప్పటికే ఎమ్మెల్యేగా ఉన్న వ్యక్తిని ఎమ్మెల్యేగా నిలబెడుతుందని ఎవరూ అనుకోవడం లేదు. అయితే ఆర్థికంగా బలవంతుడైన కోమటిరెడ్డి రాజగోపాల్ రెడ్డి బలమైన అభ్యర్థి అవుతారన్న చర్చ మాత్రం జరుగుతోంది. ఆయన కాంగ్రెస్ పార్టీకి.. ఎమ్మెల్యే పదవికి రాజీనామా చేసి బీజేపీలో చేరి.. పోటీ చేయించే అంత వ్యూహం బీజేపీ అమలు చేస్తుందా.. అన్న సందేహం కూడా ఉంది. ఎందుకంటే బీజేపీలోనే టిక్కెట్ కోసం పెద్ద ఎత్తున పోటీ ఉంది. నేతలు పోటీలు పడి ఎవరికి వారు ప్రచారం చేసుకుంటున్నారు. ఇలాంటి పరిస్థితుల్లో కోమటిరెడ్డిని బతిమిలాడి.. పార్టీలోకి తీసుకుని టిక్కెట్ ఇస్తే.. ఆ నేతలు కలిసి పని చేస్తారా అన్నది బీజేపీ వర్గాలకు ఉన్న అనుమానం.
మొత్తానికి రాజగోపాల్ రెడ్డి నోట బీజేపీ మాట రావడం ఇదే మొదటి సారి కాదు. గతంలో ఢిల్లీ పెద్దల్ని కలిసి వచ్చాడు. అయితే బీజేపీలో తానే సీఎం అభ్యర్థి చెప్పుకోవడంతో వారు పక్కన పెట్టేశారు. అప్పుడు మళ్లీ కాంగ్రెస్ పాట పాడారు. సోదరుడు కోమటిరెడ్డికి పీసీసీ చీఫ్ పదవి ఇవ్వకపోతే బీజేపీలోకి పోతానని బెదిరింపులు కూడా చేశారు. ఇప్పుడు మళ్లీ సాగర్ ఎన్నికలకు ముందు ప్రారంభించారు. ఇలాంటి నిలకడ లేని నేతను బీజేపీ సీరియస్‌గా ఆహ్వానిస్తుందా … పోటీకి పెడుతుందా..అన్నది ఆ పార్టీలోనే కొంత మంది నేతలకు ఉన్న సందేహం.
