టాలీవుడ్‌లో స్టార్ రైట‌ర్ అనే హోదా చాలా త‌క్కువ‌మందికే వ‌చ్చింది. అలాంటి ర‌చ‌యిత‌ల్లో కోన వెంక‌ట్ పేరు త‌ప్ప‌కుండా ఉంటుంది. ఒక‌ప్పుడు బ్లాక్ బ‌స్ట‌ర్ చిత్రాల‌కు కేరాఫ్ అడ్ర‌స్ ఆయ‌న‌. ఈమ‌ధ్య ఆ దూకుడు కాస్త త‌గ్గింది. ప్ర‌స్తుతం చిరంజీవి – బాబి చిత్రానికి ప‌ని చేస్తున్నారాయ‌న‌. త్వ‌ర‌లోనే మెగా ఫోన్ ప‌ట్టాల‌న్న‌ది కోన ఆలోచ‌న‌. అందుకు త‌గిన క‌థ సిద్ధం చేశారు కూడా. అయితే ఓ పెద్ద హీరోతో ఈ ప్రాజెక్టు ప‌ట్టాలెక్కించాల‌ని తెగ ప్ర‌య‌త్నిస్తున్నారు. ప్ర‌స్తుతానికి పెద్ద హీరోలంతా బిజీ. ఒక‌ప్పుడు `క‌థ కావాలి..` అంటూ కోన చుట్టూ తిరిగిన‌వాళ్లు కూడా ఇప్పుడు కోన‌కు డేట్లు ఇచ్చే ప‌రిస్థితుల్లో లేరు. అందుకే ఓ యువ హీరోతో సినిమా చేయాల‌ని ఫిక్స‌యిన‌ట్టు స‌మాచారం. గ‌తంలో కూడా కోన వెంక‌ట్ ద‌ర్శ‌క‌త్వ ప్ర‌య‌త్నాలు జ‌రిగాయి. ఓ సినిమా మొద‌లై, మ‌ధ్య‌లోనే ఆగిపోయింది. ఆ త‌ర‌వాత మెగా ఫోన్ ప‌ట్టింది లేదు. `గీతాంజ‌లి`, `శంక‌రా భ‌ర‌ణం` చిత్రాల‌ను తెర వెనుక నుంచే ఆయ‌న డైరెక్ష‌న్ చేశార‌ని టాక్‌. ఇప్పుడు నేరుగా.. తెర ముందుకు రాబోతున్నారు. ఆ హీరో ఎవ‌రు? ఆ ప్రాజెక్టు ఎప్పుడు మొద‌ల‌వుతుంద‌న్న విష‌యాలు త్వ‌ర‌లో తెలుస్తాయి.