మ‌ల్టీస్టార‌ర్ స‌రికొత్త క‌మ‌ర్షియ‌ల్ హంగు అయిపోయింది. మ‌ల్టీస్టార‌ర్ సినిమాకున్న స్టామినా ఏపాటిదో.. రాజ‌మౌళి చూపించేస్తున్నాడు. `ఆర్‌.ఆర్‌.ఆర్‌`తో. ఈ సంక్రాంతికి రాబోతున్న `భీమ్లా నాయ‌క్‌` కూడా ఓర‌కంగా మ‌ల్టీస్టార‌రే. ప‌వ‌న్ క‌ల్యాణ్ – రానా ఈ చిత్రంలో హీరోలుగా న‌టిస్తున్నారు. ఇప్పుడు కొర‌టాల కూడా మ‌ల్టీస్టార‌ర్ క‌థే రాసుకున్నాడ‌ట‌.

ప్ర‌స్తుతం `ఆచార్య‌`ని ముస్తాబు చేస్తున్నాడు కొర‌టాల‌. ఆ త‌ర‌వాత‌ ఎన్టీఆర్ తో ఓ సినిమా చేయ‌బోతున్నాడు. ఆ త‌ర‌వాత కొర‌టాల ప్ర‌యాణం నంద‌మూరి బాల‌కృష్ణ‌తోనే. బాల‌య్య‌తో కొర‌టాల కాంబో దాదాపుగా ఖాయ‌మైంది. అయితే ఈసారి… మ‌ల్టీస్టార‌ర్ క‌థ రాసుకున్నాడు కొర‌టాల‌. బాల‌య్య‌తో పాటుగా మ‌రో అగ్ర హీరో ఈసినిమాలో క‌నిపించ‌బోతున్నాడు. ఆ హీరో క‌చ్చితంగా టాప్ 3 హీరోల్లో ఒక‌డ‌న్న‌ది ఇండ్ర‌స్ట్రీ వ‌ర్గాల టాక్‌. ఆర్‌.ఆర్‌.ఆర్‌తో మెగా – నంద‌మూరి హీరోల్ని రాజ‌మౌళి ఎలా క‌లిపాడో? అలానే ఈ సినిమాతో రెండు కాంపౌండ్ ల హీరోల్ని ఒకే తెర‌పైకి తీసుకురావాల‌న్న‌ది కొర‌టాల ప్ర‌య‌త్నం. బ‌హుశా.. ఆర్‌.ఆర్‌.ఆర్ త‌ర‌వాత తెర‌కెక్క‌బోయే క్రేజీ మ‌ల్టీస్టార‌ర్ ఇదే కావొచ్చు.