టాలీవుడ్‌లో రాజ‌మౌళి త‌ర‌వాత మోస్ట్ వాంటెడ్ డైరెక్ట‌ర్‌… కొర‌టాల శివ అనే చెప్పొచ్చు. ఒక‌టా రెండా.. ఏకంగా నాలుగు బ్లాక్ బ్ల‌స్ట‌ర్స్‌. ఒక‌దాన్ని మించిన విజ‌యం మ‌రోటి. కొర‌టాల పేరు చెబితే – క‌థ కూడా విన‌కుండా సినిమా ఓకే చేసేయొచ్చు అన్న ధీమా క‌లిగింది. త‌న 5వ సినిమాపై ఇంకా సందిగ్థ‌త నెల‌కొంది. చిరంజీవితో కొర‌టాల సినిమా ఆల్మోస్ట్ ఖాయమైపోయింది. కాక‌పోతే చిరు ఇప్పుడు `సైరా`తో బిజీగా ఉన్నాడు. 2019 వేస‌విలో విడుద‌ల‌య్యే సినిమా ఇది. అంటే.. దాదాపు 10 నెల‌లు చిరు కోసం ఎదురు చూడాలి. ఈలోగా కొర‌టాల‌కు ఓ సినిమా చేసే ఛాన్సుంది. కానీ చిరంజీవి కోసం ఆ ప్ర‌య‌త్నం విర‌మించుకుంటున్నాడ‌ని టాక్‌. కొర‌టాల ద‌గ్గ‌ర దాదాపు ఏడెనిమిది క‌థ‌లు డైలాగ్ వెర్ష‌న్‌తో స‌హా సిద్ధంగా ఉన్నాయి. ఎప్పుడంటే అప్పుడు ఆ సినిమాల్ని ప‌ట్టాలెక్కించేయొచ్చు. కాక‌పోతే చిరంజీవికి స‌రి ప‌డా క‌థ ఆయ‌న ద‌గ్గ‌ర లేదు. ఉన్నా… స్క్రిప్టు మొత్తం తిర‌గరాయాల్సివ‌స్తోంది. అందుకే… చిరు కోసం ఈ ప‌ది నెల‌లూ స్క్రిప్టు మీదే కూర్చోవాల‌ని కొర‌టాల డిసైడ్ అయ్యాడ‌ట. మ‌రోవైపు చిరంజీవి మాత్రం `నీకు కావాలంటే ఈలోగా మరో సినిమా చేసుకో` అని ప‌ర్మిష‌న్ ఇచ్చాడ‌ట. అయితే.. కొర‌టాల మాత్రం ఆ రిస్కు తీసుకోవ‌డం లేద‌ని తెలుస్తోంది. మరో హీరోతో సినిమా చేసి. అది పూర్త‌య్యేలోగా.. `సైరా` ప‌నులు అయిపోతాయి. అప్పుడు చిరు కోసం మ‌ళ్లీ క‌థ కోసం కూర్చోవాలి. అప్పుడు త‌గినంత స‌మ‌యం ఉంటుందో, లేదో అన్న‌ది కొర‌టాల అనుమానం. `భ‌ర‌త్‌..` కోసం శివ చాలా క‌ష్ట‌ప‌డ్డాడు. విడుద‌ల త‌ర‌వాత కూడా ప్ర‌మోష‌న్ల ప‌రంగా చాలా శ్ర‌మించాడు. అందుకే రెండు నెల‌ల పాటు పూర్తిగా విశ్రాంతి తీసుకుందామ‌నుకుంటున్నాడ‌ట. ఆ త‌ర‌వాత… చిరు సినిమాకి సంబంధించిన స్క్రిప్టు ప‌నులు మొద‌లెట్టాల‌ని భావిస్తున్నాడ‌ట. ఈలోగా మరో స్టార్ హీరో వ‌చ్చి.. టెమ్ట్ చేస్తే త‌ప్ప – చిరుపై నుంచి కొర‌టాల దృష్టి మ‌ర‌ల‌ద‌ని.. ఆయ‌న స‌న్నిహితులు చెబుతున్నారు. సో… చిరు కోసం కొర‌టాల ఓ సినిమా త్యాగం చేస్తున్నాడ‌నే అనుకోవాలి.
చిరు కోసం కొర‌టాల త్యాగం చేస్తాడా?
