గౌత‌మి పుత్ర శాత‌క‌ర్ణి హీరోయిన్ ఎవ‌రు? అనే విష‌యంలో ఇంకా డైలామా కొన‌సాగుతూ ఉంది. న‌య‌న‌తార పేరు ప్ర‌స్తావ‌న‌కు వ‌చ్చినా… ఆమె కాల్షీట్లు అందుబాటులో లేక‌పోవ‌డంతో క్రిష్ కు పెద్ద స‌మ‌స్య ఎదురైంది. ఇప్పుడు క్రిష్ చేతిలో ఉన్న‌వి రెండే ఆప్ష‌న్లు. ఒక‌టి న‌య‌న కోసం ఎదురుచూడాలి. లేదంటే మరో క‌థానాయిక‌ని ఎంచుకోవాలి. అనుష్క వైపు మొగ్గు చూపుతున్నా.. ఆమె నుంచి కూడా కాల్షీట్ల స‌మ‌స్య ఎదుర‌వుతోంది. క్రిష్‌కి ఇప్పుడు బ‌ల్క్ గా కాల్షీట్లు కావాల‌ట. కోరిన‌న్ని కాల్షీట్లు ఇవ్వ‌డానికి అనుష్క సిద్ధంగా లేదు. ఎందుకంటే బాహుబ‌లి సినిమాతో ఆమె బిజీ. త్వ‌ర‌లోనే భాగ్‌మ‌తి ప్రారంభం కానుంది. త‌మిళ సింగం కూడా సెట్స్‌పై ఉంది. ఈ ద‌శ‌లో గౌత‌మి పుత్ర‌కు కావ‌ల్సిన‌న్ని కాల్షీట్లు స‌ర్దుబాటు చేసే అవ‌కాశం లేదు.
మ‌రోవైపు ఇలియానా పేరు కూడా చ‌ర్చ‌ల ద‌శ‌లో ఉంది. ఇలియానా అయితే.. కాల్షీట్ల స‌మ‌స్య ఉండ‌దు. పైగా బాల‌య్య‌తో ఫ్రెష్ కాంబినేష‌న్‌. అయితే బాల‌య్య ప‌క్క‌న బ‌క్క‌బ‌ల్చ‌ని భామ సెట్ అవుతుందా, అన్న అనుమానాలు నెల‌కొన్నాయి. ఈ సినిమాని సంక్రాంతికి విడుద‌ల చేసేయాలంటే.. క‌థానాయిక కోసం అట్టే కాలం ఆగ‌డం వీలు కాదు. అందుకే దొరికిన ఆప్ష‌న్‌తో స‌ర్దుకుపోవడం మిన‌హా మరో మార్గం లేదు. ఆ క‌న్‌ఫ్యూజ‌న్‌లోనే ఉన్నాడు క్రిష్. మరో వారం రోజుల్లో గౌత‌మి పుత్ర..సెట్స్‌పైకి వెళ్తోంది. ఈలోగా క‌థానాయిక ఎవ‌రో తేల్చేసుకోవాలి.
