హైదరాబాద్: భారతీయ జనతాపార్టీ కురువృద్ధుడు ఎల్.కె.అద్వానీ ఇవాళ కంటతడి పెట్టుకున్నారు. లలిత్ గేట్ కుంభకోణంపై ఇవాళ లోక్‌సభలో జరిగిన చర్చ సందర్భంగా ప్రతిపక్షాల ఆరోపణలకు, విమర్శలకు బదులిస్తూ విదేశాంగశాఖమంత్రి సుష్మాస్వరాజ్ అరగంటపాటు అనర్గళంగా చేసిన ప్రసంగం చూస్తూ అద్వానీ ఉద్వేగభరితులయ్యారు. సభలో సుష్మ పక్కన కూర్చుని ఉన్న అద్వానీ, ఆమె ప్రతిపక్షాల విమర్శలను ఆవేశంగా, ధాటిగా తిప్పికొట్టటంచూసి పలుసార్లు కళ్ళుతుడుచుకోవటం కనిపించింది.ప్రసంగం పూర్తిచేసి కూర్చున్న తర్వాత సుష్మను అద్వానీ వెన్ను తట్టి ప్రశంసించారు. పార్లమెంట్‌లో ఎన్నో చరిత్రాత్మక ఘట్టాలను చూసిఉన్న అద్వానీ ఇవాళ సుష్మ ప్రసంగాన్నిచూసి ఇలా కంటతడి పెట్టుకోవటం అందరినీ ఆశ్చర్యపరిచింది. సుష్మ అద్వానీ శిష్యురాలన్న సంగతి తెలిసిందే. మరోవైపు సోషల్ మీడియాలోకూడా సుష్మ ప్రసంగానికి ప్రశంసలు లభిస్తున్నాయి.