ఈ మధ్య ఎవరో రాత్రి పన్నెండు గంటలకు నాన్నతో.. తర్వాత ఒంటిగంటకు తాతతో మీటింగ్ ఉంటుందని చెబితే నమ్మలేదు కానీ ఇప్పుడుచాలా మంది నేరుగా అలాంటి అనుభవాలతో తెర ముందుకు వస్తున్నారు. వైసీపీ నాయకురాలు లక్ష్మి పార్వతికి.. చనిపోయిన ఎన్టీఆర్‌తో మాట్లాడే చాన్స్ వచ్చిందట. కానీ ఆమె తన్నుకొచ్చిన ఏడుపు వల్ల మాట్లాడలేక చాన్స్ మిస్ చేసుకుంది. ఆమె ఏడుపు చూసో లేకపోతే.. మరో కారణమో కానీ ఆమె ఏడ్చి చూసే సరికి ఏన్టీఆర్ లేరు. ఈ విషయాన్ని ఎవరో చెప్పలేదు.. ఆమెనే చెప్పారు.
ఎన్టీఆర్ వర్థంతి సందర్భంగా ఆయనకు నివాళులర్పించి.. ఇరవై ఆరేళ్ల తర్వాత ఓ షాకింగ్ వార్త చెబుతానంటూ మీడియా అందర్నీ అటెన్షన్‌లో పెట్టారు. ఆ తర్వాత ఏంజరిగిందో చెప్పారు. ” ఎన్టీఆర్ గారు చనిపోగానే ఆయన ఆత్మతో మాట్లాడదామని నేనే ప్రయత్నం చేశాను. జీవితా రాజశేఖర్ నన్ను మద్రాసు తీసుకెళ్లి కుముద్విని అనే 16 ఏళ్ల అమ్మాయితో కలిపించారు. ఆ అమ్మాయి ఎన్నో ఆత్మలను తనలో ప్రవేశింపజేసుకొని వారితో అన్ని మాట్లాడిస్తూ ఉంటుంది. అలా చాలా మంది ఆ అమ్మాయికి దగ్గరికి వెళ్లేవారు. అలా నా భర్త ఎన్టీఆర్ కూడా నాకు ఏం చెప్పారో తెలుసుకుందామని ఆ అమ్మాయి దగ్గరికి వెళ్లా. నేను వెళ్లగానే ఆ అమ్మాయి ఎన్టీఆర్‌లా ప్రవర్తించింది. ఆ హావభావాలు, ఒంటితీరు, కూర్చొనే తీరు మొత్తం ఎన్టీఆర్‌లా వ్యవహరించింది. ఆ స్థితిలో ఆమెను నేను ఎన్నో ప్రశ్నలు అడుగుదామని అనుకున్నా.. కానీ, దు:ఖం తన్నుకొచ్చి ఏమీ అడగలేకపోయాను” అంటూ నిట్టూర్చారు.
ఇంకా ఎన్టీఆర్ ఏమైనా చెప్పి ఉంటారేమో అని మీడియా ప్రతినిధులు చాలా కుతుహలానికి గురయ్యారు కానీ.. లక్ష్మి పార్వతి ఆ చాన్స్ మిస్ చేసుకున్నారు. ఆత్మలతో ప్రేతాత్మలతో మాట్లాడుతామని.. చాలా మంది ఇటీవలి కాలంలో చెబుతూ వస్తున్నారు. అలాంటి వారందర్ని చూస్తూంటే… త్వరలోనే.. మనుషుల్లోనే ఊహాతీత వ్యక్తులున్నారని నమ్మాల్సిన పరిస్థితి ఏర్పడుతుందేమో ?
