హైదరాబాద్: రాష్ట్రాన్ని కుదిపేసిన కాల్‌మనీ అంశంపై తెలుగుదేశం ప్రభుత్వం చర్చకు ససేమిరా అనటమేమిటని వైఎస్ఆర్ కాంగ్రెస్ అధినేత జగన్మోహన్ రెడ్డి ప్రశ్నించారు. జగన్ ఇవాళ హైదరాబాద్‌లో మీడియాతో మాట్లాడారు. కాల్‌మనీ కేసులను సాధారణ వడ్డీ వ్యాపారం కేసులుగా చిత్రీకరిస్తున్నారని ఆరోపించారు. సెక్స్ రాకెట్ విజయవాడలో జరిగితే రాష్ట్రవ్యాప్తంగా దాడులు ఎందుకని అడిగారు. వడ్డీవ్యాపారానికి లింక్ చేసి కేసులను నీరు గార్చారని ఆరోపించారు. సెక్స్ రాకెట్‌లో వడ్డీలు కడతారా, వ్యభిచారం చేస్తారా అని అడిగారని చెప్పారు. కాల్‌మనీ వ్యాపారులు వందలమంది ఆడవాళ్ళ మాన, ప్రాణాలతో చెలగాటమాడారని అన్నారు. వందల వీడియో టేపులు పట్టుబడ్డాయని చెప్పారు.

రోజా సస్పెన్షన్‌పై మాట్లాడుతూ, రోజమ్మను కావాలని ఏడాది పాటు సస్పెండ్ చేశారని ఆరోపించారు. కామ సీఎమ్ అని అందరమూ అన్నామని, కావాలని రోజమ్మను మాత్రమే సస్పెండ్ చేశారని అన్నారు. ఏడాదిపాటు సస్పెండ్ చేసే అధికారం స్పీకర్‌కు లేదని చెప్పారు. నిన్న కూడా సభలో రోజమ్మ వ్యాఖ్యలను వక్రీకరించారని ఆరోపించారు. చంద్రబాబు రాక్షసపాలను ఆయనకు తెలియచెప్పటంకోసమే అవిశ్వాస తీర్మానం ప్రవేశపెడుతున్నామని చెప్పారు. టీడీపీ ప్రభుత్వంలో అవినీతి హద్దులు దాటిపోయిందని అన్నారు. తూర్పు, పశ్చిమ గోదావరి జిల్లాలనుంచి ఇసుక దందాలో నారా లోకేష్‌కు రోజుకు కోటి రూపాయలు వెళుతోందని అన్నారు. ముఖ్యమంత్రి తన బంధువులకు కారుచౌకగా భూములు కట్టబెడుతున్నారని ఆరోపించారు. బాలకృష్ణ వియ్యంకుడికి కృష్ణానది ఒడ్డున జగ్గయ్యపేట వద్ద 498 ఎకరాలను ఎకరం లక్ష రూపాయల చొప్పున కేటాయించారని, దాని విలువ ప్రస్తుతం రు.50 లక్షలని చెప్పారు. అదేమని అడిగితే వారు 2013లోనే దరఖాస్తు చేసుకున్నారని అన్నారు. ప్రస్తుతం ఆ భూమి మొత్తం విలువ రు. 5 కోట్లకు ఇచ్చేశారని మండిపడ్డారు. చిత్తూరుజిల్లా కరకంబాడిలో గల్లా అరుణ కుటుంబానికి 21.69 ఎకరాల భూమిని ఎకరం రు.22 లక్షల చొప్పున కేటాయించారని, ఆ భూమి విలువ ఎకరా రు.2 కోట్ల నుంచి రు.2.5 కోట్ల వరకు ఉంటుందని చెప్పారు. విశాఖపట్నం మధురవాడలో 50 ఎకరాల భూమికి సంబంధించి ఎకరం విలువ రు.15 కోట్లు బహిరంగ మార్కెట్‌లో ఉంటే దాని మార్కెట్ విలువను రు.7.26 కోట్లుగా నిర్ధారించి, ఏపీఐఐసీకి రు.50 లక్షల చొప్పున కేటాయించారని, ఏపీఐఐసీ ఆ భూమిని చంద్రబాబు బినామీలకు రు.50 లక్షలకే కేటాయించారని ఆరోపించారు. శ్రీకాకుళంలో టీడీపీ పార్టీ ఆఫీసుకోసం చంద్రబాబు తనంతట తానే భూమిని కేటాయించుకున్నారని చెప్పారు. అమరావతి నిర్మాణానికి సింగపూర్ ప్రభుత్వం ముందుకొచ్చిందని మొదట చంద్రబాబు చెప్పారని, చివరికి చూస్తే వచ్చేది సింగపూర్‌లోని ప్రైవేటు కంపెనీలని తేలిందని అన్నారు. ఆ కంపెనీలకు రాజధానికి భూమిని స్విస్ ఛాలెంజ్ పద్ధతిలో ఇవ్వటమంటే – నామినేషన్ పద్ధతిలో దొంగదారిలో తనకు కావల్సినవారికి భూములు ఇవ్వటమేనని ఆరోపించారు. 99 ఏళ్ళకు లీజుకు ఇవ్వటమేమిటని ప్రశ్నించారు. ఇసుక ధరను క్యూబిక్ మీటర్ రు.40 నుంచి రు.700కు పెంచారని ఆ లెక్కన రు.1,500 కోట్ల ఆదాయం రావాలని, కానీ రు.810 కోట్లే చూపుతున్నారని అన్నారు. జెన్‌కో ధర్మల్ ప్లాంట్లలో కుంభకోణం జరుగుతోందని జగన్ ఆరోపించారు.