మహేష్ బాబు దూకుడు చూపిస్తున్నాడు. బయటా… బాక్సాఫీస్ దగ్గర! ‘భరత్ అనే నేను’ విడుదలకు రెండు రోజుల ముందు నుంచి మ‌హేష్‌కి విరామం లేదు. విశ్రాంతి లేదు. ప్రతిరోజూ ఫుల్ బిజీ. బాక్సాఫీస్ దగ్గర భరత్ ఓ రేంజ్‌లో బ్యాటింగ్ చేస్తుంటే… మహేష్ అభిమానులకు కిక్ ఇచ్చే వార్త రోజుకి ఒకటి వస్తుంది. భరత్ బహిరంగ సభకు ఎన్టీఆర్ రావడం ఒక విశేషం అయితే… సభ పూర్తయ్యాక ఎన్టీఆర్, రామ్ చరణ్, కుటుంబ సభ్యులతో మహేష్ పార్టీ చేసుకోవడం మరో విశేషం. విడుదల తరవాత సినిమాకి సూపర్ హిట్ టాక్ రావడం ఒక విశేషం అయితే… రాజకీయ నేపథ్యంలో రూపొందిన ఈ సినిమాని తెలంగాణ రాష్ట్ర మంత్రి కేటీఆర్ స్వయంగా చూసి, సినిమాని అభినందించడం మరో విశేషం. అలాగే, మహేష్ చేనేత వస్త్రాలను ధరించడం మరో విశేషం. సినిమా హిట్టయ్యాక ఎన్టీఆర్, రామ్ చరణ్‌ల‌తో మరోసారి పార్టీ చేసుకోవడం ఘట్టమనేని అభిమానులతో పాటు తెలుగు సినిమాలను అభిమానించే ప్రేక్షకులందరికీ కిక్ ఇచ్చింది. దీనికి తోడు ఈ రోజు విజయవాడలో అభిమానులతో కలిసి సినిమా చూడనున్నాడీ సూపర్ స్టార్. ఇవన్నీ ఒక ఎత్తు అయితే… లండన్‌లోని మేడమ్‌ తుస్సాడ్స్‌లో మహేష్ మైనపు విగ్రహాన్ని ఏర్పాటు చేయనుండటం మరో ఎత్తు. దీన్ని ఎవరూ ఉహించలేదు. ఒకదాని తరవాత మరొకటి… అభిమానులకు కిక్ ఇచ్చే వార్తలతో రెండు వారాలుగా మహేష్ దూకుడు చూపిస్తున్నాడు. వీటిని ఆయన కొత్త పీఆర్ టీమ్ కరెక్టుగా ప్రేక్షకుల్లోకి తీసుకు వెళ్తోంది. ‘బ్రహ్మోత్సవం’, ‘స్పైడర్’ సినిమాలతో డీలా పడిన అభిమానులు, ‘భరత్ అనే నేను’ విజయంతో పాటు ఆ తరవాత జరిగిన హ్యాపీ మూమెంట్స్ తో ఫుల్ రీఛార్జ్ అయ్యారు.