మురుగ‌దాస్‌పై మ‌హేష్ అభిమానులు కాస్త గుర్రుగా ఉన్నార‌న్న‌ది వాస్త‌వం. ఫ‌స్ట్ లుక్ విష‌యంలో మురుగ‌దాస్ జాప్యం చేయ‌డం, మ‌హేష్ సినిమాకి సంబంధించిన ఎలాంటి విష‌యాలూ బ‌య‌ట‌కు చెప్ప‌క‌పోవ‌డం, సినిమా అప్ డేట్స్ తెలియ‌క‌పోవ‌డం వ‌ల్ల ప్రిన్స్ ఫ్యాన్స్ బాగా ఫీలైపోతున్నారు. దాంతో మురుగదాస్ ట్విట్ట‌ర్‌ని ల‌క్ష్యంగా చేసుకొని కొన్ని పోస్టులు, కామెంట్లు పెడుతున్నారు. అందులో బండ బూతులు కూడా ఉంటున్నాయి. మురుగ‌దాస్ సినిమాతో బిజీగా ఉంటాడు, ట్విట్ట‌ర్ ఎక్క‌డ ఫాలో అవుతాడులే… అనుకొంటే పొర‌పాటే. మురుగ‌దాస్ ప్ర‌తీ ట్వీట్‌ని నిశితంగా ప‌రిశీలిస్తుంటాడ‌ట‌. తెలుగులోట్వీట్ చేస్తే.. దాని అర్థాన్ని అడిగి మ‌రీ తెలుసుకొంటాడ‌ట‌. అలా మురుగ‌దాస్‌ని తిడుతూ మ‌హేష్ పెట్టిన కొన్ని పోస్టులు మురుగ‌దాస్ ని హ‌ర్ట్ చేశాయ‌ని తెలుస్తోంది.

బుధవారం మహేష్ సినిమా ఫస్ట్ లుక్‌ని బ‌య‌ట‌కు వ‌దులుతున్నారు. నిజానికి ఈమ‌ధ్య‌న ఎన్నో పండ‌గ‌లు వ‌చ్చాయి వెళ్లాయి. ఈనెల 12వ తేదీకి ఎలాంటి ప్రాముఖ్యం లేదు. అయినా స‌రే.. ఫ‌స్ట్ లుక్ వ‌దిలేయ‌డానికి కార‌ణం.. మ‌హేష్ ఫ్యాన్స్ తీసుకొచ్చిన ఒత్తిడే అని తెలుస్తోంది. మ‌రోవైపు మ‌హేష్ కూడా ‘ఏదో ఒక‌టి రిలీజ్ చేసేయండి.. మ‌రీ ఆల‌స్యం అవ్వ‌డం కూడా మంచిది కాదు’ అంటూ మురుగ‌దాస్ కి స‌ల‌హా ఇచ్చాడ‌ట‌. నిజానికి ఈమ‌ధ్య ఫ‌స్ట్ లుక్ త‌దిత‌ర వ్య‌వ‌హారాల‌పై ఫోక‌స్ చేసేంత టైమ్ మురుగ‌దాస్‌కి లేక‌పోవ‌డం వ‌ల్ల‌.. దానిపై ఎక్కువ‌గా దృష్టి పెట్ట‌లేద‌ని, కేవ‌లం మ‌హేష్ ఫ్యాన్స్ హ‌ర్టవుతున్నార‌న్న కార‌ణంతోనే ఇప్పుడు స‌డ‌న్‌గా ఫ‌స్ట్ లుక్‌ని విడుద‌ల చేస్తున్నార‌ని చెబుతున్నారు.