భ‌ర‌త్ అనే నేను సూప‌ర్ హిట్ మ‌హేష్‌బాబులో కొత్త ఉత్సాహాన్ని రేకెత్తించింది. ఇది వ‌ర‌కు మ‌హేష్ చాలా విజ‌యాలు చూసుండొచ్చు. కానీ భ‌ర‌త్ హిట్ ఇచ్చిన ఆత్మ‌విశ్వాసం వేరు. వ‌రుస‌గా రెండు భారీ ఫ్లాపుల త‌ర‌వాత వ‌చ్చిన తిరుగులేని హిట్ ఇది. అందుకే ఇది వ‌ర‌కెప్పుడూ లేనంత ఉల్లాసంగా ఉత్సాహంగా క‌నిపిస్తున్నాడు. సినిమాని సూప‌ర్ హిట్ చేసి వ‌ద‌ల్లేదు. ప్ర‌మోష‌న్లు భారీగా చేస్తున్నాడు. తెలుగు రాష్ట్రాల్లో చ‌క్క‌ర్లు కొడుతున్నాడు. రోజురోజుకీ ప్ర‌మోష‌న్ల జోరు పెంచుతున్నాడు. ఈరోజు హైద‌రాబాద్ లో గ్రాండ్ స‌క్సెస్ మీట్ జ‌రిగింది. ఈ వేడుక‌లోనూ మ‌హేష్ స‌రికొత్త ఉత్సాహంతో క‌నిపించాడు. ఇచ్చిన స్పీచే మ‌ళ్లీ రిపీట్ చేసినా.. అత‌ని ఆనందం మాత్రం స‌రికొత్త‌గా క‌నిపించింది.”మా అమ్మ పుట్టిన రోజున ఈ సినిమా విడుద‌లైంది. మే 31న నాన్న పుట్టిన రోజు. అప్ప‌టి వ‌ర‌కూ ఈ సినిమా గురించి గొప్ప‌గా చెప్పుకోవాలి” అని మ‌హేష్ ఆకాంక్షించాడు. అప్ప‌టి వ‌ర‌కూ సినిమా నిల‌బ‌డాలి క‌దా, అందుకే ఈ రేంజులో ప్ర‌మోష‌న్లు చేస్తున్నాడేమో. ”ప్ర‌మోష‌న్ల బిజీతో వారం రోజుల నుంచీ తిరుగుతూనే ఉన్నా. ఇలాంటి రోజులు మ‌రిన్ని రావాలి. సీనియ‌ర్ న‌టుల ముందు న‌టించ‌డం గ‌ర్వంగా అనిపించింది. అభిమానులు న‌న్ను సూప‌ర్ స్టార్ అని పిలుస్తారు. నాకు వ‌రుస‌గా రెండు బంప‌ర్ హిట్లు ఇచ్చి నాలుగేళ్ల‌లో రెండు సార్లు లైఫ్ ఇచ్చారు కొర‌టాల‌. ఆయ‌న‌కెప్పుడూ రుణ‌ప‌డి ఉంటా” అంటూ కొర‌టాల‌పై త‌న అభిమానాన్ని మ‌రోసారి ప్ర‌క‌టించుకున్నాడు మ‌హేష్‌.