కుటుంబ నేప‌థ్యంలో సాగే క‌థ‌ల వైపు స్టార్ హీరోలూ దృష్టి సారిస్తున్నారు. ఎప్పుడూ మాస్‌, క‌మ‌ర్షియ‌ల్ సినిమాలే చేస్తే… ఫ్యామిలీ ఆడియ‌న్స్‌ని ఆక‌ట్టుకొనేదెలా..? అందుకే త‌ర‌చూ ఫ్యామిలీ డ్రామాల‌తో అల‌రిస్తూనే ఉన్నారు. ఇప్పుడు మ‌హేష్ బాబు కూడా అలాంటి క‌థ‌నే ఎంచుకొన్నాడ‌ని టాక్‌. మ‌హేష్ బాబు క‌థానాయ‌కుడిగా వంశీ పైడి ప‌ల్లి ద‌ర్శ‌క‌త్వంలో ఓ చిత్రం తెర‌కెక్కుతోంది. ‘భ‌ర‌త్ అను నేను’ పూర్త‌యిన వెంట‌నే ఈ సినిమా ప‌ట్టాలెక్కుతుంది. వంశీ క‌థ ఓ ఫ్యామిలీ డ్రామా అని తెలుస్తోంది. కుటుంబంలో ఉన్న అనుబంధాలు, ఆప్యాయ‌తల్ని తెర‌పైకి తీసుకొస్తార‌ట. ఇలాంటి క‌థ‌లు తానూ తీయ‌గ‌ల‌న‌ని ‘బృందావ‌నం’తో నిరూపించుకొన్నాడు వంశీపైడిప‌ల్లి. మురారి, సీత‌మ్మ వాకిట్లో సిరిమ‌ల్లె చెట్టు సిన‌మాల‌తో హిట్లు కొట్టాడు మ‌హేష్ బాబు. ఈ క‌థ కూడా మురారి, బృందావ‌నం స్టైల్‌లోనే ఉంటుంద‌ట. ‘జ‌య కృష్ణ ముకుందా మురారి’ అనే టైటిల్‌ని ఈ సినిమా కోసం ప‌రిశీలిస్తున్నార‌ని తెలుస్తోంది. దిల్‌రాజు, అశ్వ‌నీద‌త్ లు సంయుక్తంగా తెర‌కెక్కించే ఈ చిత్రం 2018 మార్చిలో సెట్స్‌పైకి వెళ్ల‌నుంది.
మ‌హేష్ కోసం మ‌రో… బృందావ‌నం+ మురారి
