శ‌ర్వానంద్ కొత్త సినిమా ‘మ‌న‌మే’ రిలీజ్ డేట్ ఖాయ‌మైంది. జూన్ 7న ఈ చిత్రాన్ని విడుద‌ల చేస్తున్న‌ట్టు నిర్మాత‌లు అధికారికంగా ప్ర‌క‌టించారు. అంటే మ‌రో 15 రోజుల టైమ్ ఉంద‌న్న‌మాట. నిజానికి ఓ సినిమాని ప్రేక్ష‌కుల ముందుకు తీసుకెళ్ల‌డానికి ప‌దిహేను రోజుల స‌మ‌యం చాలు. కానీ ఇప్పుడున్న ప‌రిస్థితుల్లో, సినిమాపై ఆస‌క్తి పెంచ‌డానికీ, ప్రేక్ష‌కుల్ని థియేట‌ర్ల‌కు ర‌ప్పించ‌డానికి ఈ టైమ్ స‌రిపోవ‌డం లేదు. పైగా జూన్ 4 వ‌ర‌కూ ఏపీలో ఎల‌క్ష‌న్ మూడ్ క‌నిపిస్తూనే ఉంటుంది. ఆ త‌ర‌వాత కూడా కొంత హంగామా ఉంటుంది. ఈ నేప‌థ్యంలో ఉన్న‌ట్టుండి రిలీజ్ డేట్ ప్ర‌క‌టించేసింది చిత్ర‌బృందం.
శ్రీ‌రామ్ ఆదిత్య ద‌ర్శ‌క‌త్వం వ‌హించిన ఈ చిత్రాన్ని పీపుల్ మీడియా ఫ్యాక్ట‌రీ తెర‌కెక్కించింది. కృతిశెట్టి క‌థానాయిక. శ‌ర్వా కెరీర్‌లోనే భారీ బ‌డ్జెట్ సినిమా ఇదంటున్నారు. అలాంట‌ప్పుడు రిలీజ్ డేట్, ప‌బ్లిసిటీ విష‌యంలో చాలా కేర్ తీసుకోవాల్సిందే. చిత్ర‌బృందం మాత్రం కంటెంట్ పై ఉన్న న‌మ్మ‌కంతో హ‌డావుడిగా రిలీజ్ డేట్ ప్ర‌క‌టించేసి, రంగంలోకి దించేస్తున్నారు. ఒక‌ట్రెండు రోజుల్లో ప్ర‌మోష‌న్ కూడా మొద‌లెట్టేస్తారు. చూద్దాం.. ఏమ‌వుతుందో?!
