“మా” ఎన్నికల్లో గెలిపిస్తే సభ్యులకు సినిమా అవకాశాలు కల్పించడం దగ్గర్నుంచి.. వారి పిల్లల చదువులకు , పెళ్లిళ్ల వరకూ అన్నింటికీ సాయం చేస్తామని మంచు విష్ణు ప్రకటించారు. ఈ మేరకు ఆయన పార్క్ హయత్ హోటల్‌లో మేనిఫెస్టోను విడుదల చేశారు. మొత్తం అందులో పధ్నాలుగు అంశాలు పెట్టారు. అందులో మొదటిది సభ్యులకు సినిమా అవకాశాలు కల్పించడం. ప్రత్యేకంగా యాప్ తయారు చేయిస్తానని అందరికీ అందుబాటులో ఉంచి.. అవకాశాలు కల్పిస్తామని విష్ణు ప్రకటించారు. జాబ్ కమిటీ వేసి అన్ని ప్రొడక్షన్స్, ఓటీటీ ప్లాట్‌ఫామ్‌ల వద్దకు వెళ్లి ఒప్పందం చేసుకుంటామని చెప్పుకొచ్చారు.
“మా” భవనాన్ని సొంత డబ్బుతో నేను కడతానని అందు కోసం మూడు స్థలాలు చూశానని ప్రకటించారు. అయితే మేనిఫెస్టోలో సొంత డబ్బుతో కడతానని చెప్పలేదు. ఇక “అర్హులు” అనే పదం వాడి పలు హమీలు ప్రకటించారు. వాటిలో ప్రభుత్వంతో మాట్లాడి సొంత ఇల్లు ఇవ్వడం, ఉచిత వైద్యం, పిల్లల పెళ్లిళ్లకు సాయం, చదవులకు సాయం వంటివి ఉన్నాయి. అర్హులైన సభ్యుల పెళ్లి ఖర్చుల కోసం 1.16 లక్షలు “మా” తరఫున ఇస్తామన్నారు. వృద్ధకళాకారుల సంక్షేమం కోసం ఎన్‌జీవో సర్వే చేయించి అర్హులకు పింఛను అందిస్తామన్నారు.
“మా” చరిత్రలో తొలిసారిగా మహిళల రక్షణ కోసం హైపవర్ ఉమెన్ గ్రివెన్స్ సెల్ ఏర్పాటు చేస్తామని కూడా హామీ ఇచ్చారు. కొందరకి మాలో సభ్యత్వం ఉన్నా ఓటు హక్కు లేదని వారికి ఓటు హక్కు కల్పిస్తామని ప్రకటించారు. “మా” ఉత్సవాలు నిర్వహించి ఫండ్ సేకరించి.. వాటిని మంచి పనులకు ఉపయోగిస్తామన్నారు. కేంద్ర రాష్ట్ర పథకాలకు మా సభ్యులు అర్హులు అయితే వారికి అందేలా ప్యానల్ కృషి చేస్తుందని ప్రకటించారు. జూన్‌లో మోహన్ బాబు ఫిల్మ్ ఇనిస్టిట్యూట్ ప్రారంభించి .. మా సభ్యులకు సగం స్కాలర్ షిప్ ఇస్తామని హామీ ఇచ్చారు.
