ఎల‌క్ష‌న్ల సీజ‌న్‌కి త‌గిన హంగామాతో వ‌స్తున్నాడు మంచు విష్ణు. రెండేళ్ల క్రిత‌మే పూర్త‌యి ఆగిపోయిన `ఓటర్` సినిమాని ఈ సీజ‌న్‌లో ప్రేక్ష‌కుల ముందుకు తీసుకురావ‌డానికి సన్నాహాలు చేస్తున్నాడు. సుర‌భి కథానాయిక‌గా న‌టించిన చిత్రిమిది. జీఎస్‌ కార్తిక్ ద‌ర్శ‌క‌త్వం వ‌హించాడు. టీజర్ విడుద‌లైంది.
‘అహింస మార్గం ద్వారా ఒక్క బుల్లెట్‌ కూడా కాల్చకుండా స్వాతంత్ర్యం తెచ్చుకున్న దేశం మనది. మనం పేదరికంపై పోరాటం చేశాం కానీ పేదలపై పోరాటం చేయలేదు. మార్పు మనలో రావాలి.. మారాలి.. మార్చాలి’ అని విష్ణు చెబుతున్న డైలాగ్‌తో టీజర్ మొదలైంది. ‘నువ్వు ఆఫ్ట్రాల్‌ ఒక ఓటర్’ అని ప్ర‌తినాయ‌కుడు అంటే.. ‘నేను ఆఫ్ట్రాల్‌ ఒక ఓటర్‌ను కాను ఓనర్..’ అని విష్ణు చెబుతున్న డైలాగ్‌ టీజర్‌లో వినిపించింది. దాన్ని బ‌ట్టి.. ఈ సినిమా శైలి ఎలా ఉండ‌బోతోందో అర్థం చేసుకోవొచ్చు. పొలిటిక‌ల్ డ్రామాకి కాస్త యాక్ష‌న్ జోడించారిందులో. తెలుగు, త‌మిళ భాష‌ల్లో ఒకేసారి విడుద‌ల చేయాల‌ని చూస్తున్నారు. మంచు కుటుంబానికి విజ‌యాలు ఎప్పుడో దూరం అయిపోయాయి. అయినా స‌రే.. విష్ణు విశ్వ ప్ర‌య‌త్నం చేస్తూనేఉన్నాడు. మ‌రి ఈసారి ఓటర్ ఏం చేస్తాడో చూడాలి. త‌మ‌న్ సంగీతం అందించిన ఈ చిత్రాన్ని ఏప్రిల్‌లో విడుద‌ల చేస్తున్నారు.
