చేతిలో హిట్స్ ఉన్నా, త‌దుప‌రి సినిమా ఆల‌స్యం అవుతోందంటే, ఏ ద‌ర్శ‌కుడికైనా ఫ‌స్ట్రేష‌న్ వ‌చ్చేస్తుంది. హిట్ ని క్యాష్ చేసుకోలేక‌పోతున్నా అనే బాధ అది. చాలామంది ద‌ర్శ‌కులు ఇలాంటి బాధ‌లు ప‌డుతున్న‌వాళ్లే. మారుతి చేతిలోనూ ఓ బంప‌ర్ హిట్ ఉంది. `ప్ర‌తీరోజూ పండ‌గే`తో ఓ సూప‌ర్ హిట్ కొట్టారాయ‌న‌. అయితే.. త‌దుప‌రి సినిమా మాత్రం ఆల‌స్యం అవుతోంది. రామ్ లాంటి హీరోల పేర్లు బ‌య‌ట‌కు వ‌చ్చినా అవేవీ ఫిక్స్ కాలేదు. ఇప్పుడు గోపీచంద్ పేరు గ‌ట్టిగా వినిపిస్తోంది. మారుతి – గోపీచంద్ కాంబోలో ఓ సినిమా వ‌స్తుంద‌ని ప్ర‌చారం జ‌రుగుతోంది. అయితే మారుతి మాత్రం రిలాక్డ్స్‌గా ఉన్నారు.

“షూటింగులు మొద‌ల‌వ్వ‌డానికి మ‌రో రెండు నెల‌లైనా ప‌డుతుంది. అప్పుడు ఏ హీరోలు ఎవ‌రెవ‌రికి అందుబాటులో ఉంటారో తెలీదు. ఆ స‌మ‌యానికి నా క‌థ‌కు ఎవ‌రు సూట‌వుతారో వాళ్ల‌నే ఎంచుకుంటా. హీరోల కోసం క‌థ‌లెప్పుడూ రాయ‌ను. క‌థ రాశాకే హీరో ద‌గ్గ‌ర‌కు వెళ్తా. ప్ర‌స్తుతానికి నా క‌థ సిద్ధం అవుతోంది. హీరో ఎవ‌ర‌న్న‌ది ప‌రిస్థితులు నిర్ణ‌యిస్తాయి“ అంటున్నాడు మారుతి. ఈ లెక్క‌న ఆయ‌న‌కు హీరో ఎవ‌రైనా ఓకే. మారుతి ఎప్పుడూ అంతే. పెద్ద పెద్ద హిట్స్ కొట్టిన‌ప్పుడు కూడా – స్టార్ల వెంట ప‌డ‌లేదు. త‌న‌కు అందుబాటులో ఉన్న‌వాళ్ల‌తోనే స‌ర్దుకుపోయాడు. ఈసారీ అంతేనేమో.