ఐదేళ్ల క్రింద‌ట విడుదలైన చిత్రం ‘మ‌త్తు వ‌ద‌ల‌రా’. ఇప్పుడు దానికి సీక్వెల్ రెడీ అయ్యింది. ఈనెల 13న ఈ చిత్రాన్ని విడుద‌ల చేస్తున్నారు. ‘మ‌త్తు వ‌ద‌ల‌రా’ సినిమాకి కామెడీ ప్ల‌స్ పాయింట్ అయ్యింది. స‌త్య ట్రాక్ సూప‌ర్బ్ గా వ‌ర్క‌వుట్ అయ్యింది. దానికి తోడు సీరియ‌ల్ పై వేసిన సెటైర్ బాగా పేలింది. ఇప్పుడు పార్ట్ 2లోనూ వాటినే హైలెట్ చేయ‌డానికి చిత్ర‌బృందం ప్ర‌య‌త్నించింది. కీర‌వాణి త‌న‌యుడు సింహా ఈ చిత్రంలో హీరో. అయితే సినిమాని న‌డిపించే బాధ్య‌త మొత్తం స‌త్య త‌న నెత్తిమీద పెట్టుకొన్న‌ట్టు ట్రైల‌ర్ చూస్తే అర్థ‌మ‌వుతోంది. డెలివ‌రీ ఏజెంట్లుగా పార్ట్ 1లో క‌నిపించిన శ్రీ‌సింహా, స‌త్య ఇప్పుడు సీక్రెట్ ఏజెంట్లుగా మారిపోవ‌డం విచిత్రం. వీళ్ల‌కు ఫ‌రియా అబ్దుల్లా, సునీల్, వెన్నెల కిషోర్ తోడ‌య్యారు.

కిడ్నాప్ డ్రామా, డ్ర‌గ్స్ మాఫియా… ఈ రెండింటి నేప‌థ్యంలో ఈ క‌థ సాగుతుంద‌న్న విష‌యం ట్రైల‌ర్‌లోనే చెప్పేసింది చిత్ర‌బృందం. తెర‌పై పాత్ర‌లన్నీ సీరియ‌స్ మోడ్‌లోనే క‌నిపించాయి. అయితే వాళ్లు సీరియ‌స్ గా ఉన్నా, చూస్తున్న ప్రేక్ష‌కుల‌కు కామెడీగా అనిపించ‌డం ఈ సినిమా ప్ర‌త్యేక‌త‌. సీరియ‌ల్ పై సైటైర్ ఈ సీక్వెల్ లోనూ కొన‌సాగింది. ఆ ట్రాక్ మ‌రింత బాగా ర‌క్తి క‌ట్టింద‌ని చిత్ర‌బృందం ధీమాగా ఉంది. మ‌రోసారి స‌త్య‌.. ఈ సినిమాలో హీరో అవ‌తారం ఎత్తేశాడు. త‌న కామెడీ టైమింగ్ ఈచిత్రానికి ప్ర‌ధాన ఆక‌ర్ష‌ణ‌. ఫ‌రియా ఈ సినిమా కోసం ఓ పాట రాసి, పాడి, కొరియోగ్ర‌ఫీ చేసింది. ఆ పాట కూడా కొత్త‌గా అనిపిస్తోంది. టీజ‌ర్‌లో మీమ్ కంటెంట్ న‌మ్ముకొన్న ‘మ‌త్తువ‌ద‌ల‌రా’ టీమ్ ఈసారి జోన‌ర్ ని ప‌రిచ‌యం చేసేందుకు ప్ర‌య‌త్నించింది. కామెడీని ఇష్ట‌ప‌డేవాళ్ల‌కు ఈ సినిమా మంచి ఆప్ష‌న్‌గా క‌నిపిస్తోంది.