దుష్ట‌శ‌క్తికీ, సామాన్యుడికీ పోరు ఎప్పుడూ ర‌స‌వ‌త్త‌రంగానే ఉంటుంది. దానికి సైన్స్‌, దైవ శ‌క్తి తోడైతే ఇక చెప్పాల్సిన ప‌నిలేదు. ఇటీవ‌ల విడుద‌లైన ‘హ‌నుమాన్‌’ ఈ జోన‌ర్ క‌థే. ఇప్పుడు సందీప్ కిష‌న్ నుంచి వ‌స్తున్న ‘మాయావ‌న్’ కూడా ఈ జోన‌ర్‌కి చెందే సినిమానే. సి.వి.కుమార్ ద‌ర్శ‌క‌త్వం వ‌హించిన చిత్ర‌మిది. రామ‌బ్ర‌హ్మం సుంక‌ర నిర్మాత‌. టీజ‌ర్ ఈరోజు విడుద‌లైంది. సైన్స్‌ని ఆస‌రాగా చేసుకొని, శ‌క్తిమంతుడిగా ఎదిగి, సూప‌ర్ మాన్ గా మారి, ఈ భూమండ‌లంపైనే ఆధిప‌త్యం చూపించాల‌నుకొనే ఓ దుర్మార్గుడి ఆట క‌ట్టించ‌డానికి ఓ సామాన్యుడు ఏం చేశాడ‌న్న‌ది ఈ టీజ‌ర్లో చూపించారు. సందీప్ చేతికి ఓ సూప‌ర్ వెప‌న్ ఏదో ఉంది. దాని చుట్టూనే ఈ క‌థ న‌డుస్తుందనిపిస్తోంది. టెక్నిక‌ల్ గా సినిమాని రిచ్‌గా తీసిన‌ట్టు అనిపిస్తోంది. యాక్ష‌న్‌కి పెద్ద పీట వేశారు.

సైన్స్ ఫిక్ష‌న్ జోన‌ర్‌లో సాగే సినిమా ఇది. రంజ‌న్ క‌పూర్ క‌థానాయిక‌. నీల్‌నితిన్ ముఖేష్ ప్ర‌తినాయ‌కుడిగా క‌నిపించ‌నున్నాడు. మురళీ శ‌ర్మ కీల‌క పాత్ర పోషించారు. సందీప్ – సి.వి.కుమార్ కాంబోలో ‘ప్రాజెక్ట్ జెడ్‌’ అనే సినిమా వ‌చ్చింది. దానికి కొన‌సాగింపుగానే ఈ ‘మాయావ‌న్’ తెర‌కెక్కింది. ప్ర‌స్తుతం హైద‌రాబాద్ ప‌రిస‌ర ప్రాంతాల్లో షూటింగ్ జ‌రుగుతోంది. త్వ‌ర‌లోనే విడుద‌ల తేదీ ప్ర‌క‌టిస్తారు. ఈ చిత్రానికి సంతోష్ నారాయ‌ణ‌న్ సంగీతాన్ని అందిస్తున్నారు.