ప్రధానమంత్రి నరేంద్రమోడీ రూ.20 లక్షల కోట్ల ప్యాకేజీని ప్రకటించారు. దేశ ఆర్థిక వ్యవస్థ మళ్లీ గాడిన పడేలా..ప్రపంచంలోనే మెరుగైన ఆర్థిక వ్యవస్థలా నిలబడేలా.. ప్యాకేజీ ప్రయోజనాలను అన్ని వర్గాల వారికి అందించేలా…ప్యాకేజీని రూపకల్పన చేశారు. దీనికి “ఆత్మ నిర్భర్ భారత్ అభియాన్” అనే పేరు పెట్టారు. ఇరవై లక్షల కోట్ల రూపాయల ప్యాకేజీ అంటే.. భారత్ జీడీపీలో దాదాపుగా పది శాతం. ఈ ఆత్మ నిర్భర్ భారత్ అభియాన్” ప్యాకేజీలో వివరాలను… బుధవారం ఆర్థిక మంత్రి నిర్మలా సీతారామన్ ప్రకటిస్తారని మోదీ తెలిపారు. ప్రస్తుత ప్యాకేజీ ద్వారా భారత్.. ప్రపంచంలో కీలక పాత్ర పోషిస్తుందని.. గ్లోబల్ సప్లై చైన్‌లో కీలకంగా ఎదుగుతుందని మోడీ విశ్వాసం వ్యక్తం చేశారు. ఆర్థిక సంస్కరణలకు ఇండియా ఎప్పుడూ ముందు ఉంటుందని.. మోడీ తెలిపారు.
ప్రధానంగా ఇరవై లక్షల కోట్ల ప్యాకేజీలో…కుదేలైన పారిశ్రామిక రంగానికి భరోసా కల్పించే అవకాశం ఉందని అంచనా వేస్తున్నారు. ఆ రంగం.. ఈ రంగం అనే తేడా లేకుండా..దేశంలోని అన్ని వ్యాపార,పారిశ్రామిక రంగాలు లాక్ డౌన్ కారణంగా దెబ్బతిన్నాయి. తమకు బెయిలవుట్ ప్యాకేజీలు ప్రకటించాలని విజ్ఞాపనలు చేస్తున్నారు. ఒక వేళ ఆదుకోకపోతే.. ఆ రంగాలన్నీ నష్టాల్లో మునిగిపోయే ప్రమాదం ఉంది. ఈ కారణంగా..నిరుద్యోగం పెరిగిపోతుంది. ఈ పరిస్థితులు రాకుండా ఉండాలంటే… వీలైనంత భారీగా ఆర్థిక ప్యాకేజీ ప్రకటించాలని విభిన్న వర్గాలనుంచి కేంద్రానికి సూచనలు, సలహాలు అందాయి. దాని ప్రకారం. కేంద్రం కొత్త ప్యాకేజీకి రూపకల్పన చేసినట్లుగా తెలుస్తోంది.
లాక్ డౌన్ విషయంలోనూ.. ప్రధానమంత్రి రాష్ట్రాలకు స్వేచ్చనిచ్చారు. దీనికి సంబంధించిన విధివిధానాలను..పద్దెనిమిదో తేదీ కన్నా ముందు ప్రకటిస్తామని మోడీ ప్రకటించారు. రాష్ట్రాల అభిప్రాయాలకు ప్రాధాన్యం ఇచ్చి..లాక్ డౌన్ కొనసాగింపు .. సడలింపుల విషయంలో నిర్ణయం తీసుకోనున్నారు. అనేక రాష్ట్రాలు.. లాక్ డౌన్ కొనసాగించాలని కోరాయి. కొన్ని రాష్ట్రాలు కంటెయిన్‌మెంట్ జోన్లకే పరిమితం చేయాలని కోరాయి. ఈ తరుణంలో మోడీ..లాక్ డౌన్ విషయాన్ని రాష్ట్రాలకే వదిలేయడం మంచిదని భావించారు. ఈ విషయంలో కేంద్రం తరపున ఈ లాక్ డౌన్ ముగిసేలోపు ప్రకటన రానుంది.
