అఖిల్ – బొమ్మ‌రిల్లు భాస్క‌ర్ కాంబోలో రూపుదిద్దుకున్న సినిమా `మోస్ట్ ఎలిజిబుల్ బ్యాచిల‌ర్‌`. పూజా హెగ్డే క‌థానాయిక‌. ఫ్లాపుల్లో ఉన్న అఖిల్ – మ‌నుగ‌డ కోసం త‌పిస్తున్న బొమ్మ‌రిల్లు భాస్క‌ర్ కాంబోలో సినిమా అంటే… పెద్ద‌గా ట్రేడ్ వ‌ర్గాలు ఆస‌క్తి చూపించ‌క‌పోవొచ్చు. కాక‌పోతే… ఆ టైటిల్‌, పూజా గ్లామ‌ర్‌, జీఏ 2 లాంటి బ్యాన‌ర్‌.. ఈసినిమాపై హోప్స్ మిగిల్చాయి.

మే 28న ఈ సినిమాని విడుద‌ల చేస్తామ‌ని చిత్ర‌బృందం ప్ర‌క‌టించింది. అయితే… ఈ సినిమా షూటింగ్ దాదాపు పూర్త‌యిపోయింది. కేవ‌లం ఒకే ఒక్క రోజు.. షూటింగ్ బాకీ ఉంది. పోస్ట్ ప్రొడ‌క్ష‌న్ కూడా.. ఓ వైపు జ‌రిగిపోతున్నాయి. మార్చి నాటికి.. ఫ‌స్ట్ కాపీ రెడీ అయిపోతుంది. అలాంట‌ప్పుడు మే వ‌ర‌కూ ఆగ‌డం ఎందుకు? అని చిత్ర‌బృందం ఇప్పుడు మ‌రోసారి ఆలోచ‌న‌లో ప‌డిన‌ట్టు టాక్‌. పైగా.. మేలో.. చిరు, వెంకీ, బాల‌య్య సినిమాలు వ‌స్తున్నాయి. ఒక రోజు వ్య‌వ‌ధిలో ఆచార్య‌, నార‌ప్ప విడుద‌ల అవుతున్నాయి. మ‌రుస‌టి వారంలో.. బాల‌య్య సినిమా వ‌స్తోంది. ఆ వెంట‌నే… బ్యాచిల‌ర్ రావాలి. పెద్ద సినిమాల ప్ర‌భావం క‌చ్చితంగా బ్యాచిల‌ర్‌పై ఉంటుంది. పైగా మార్చిలో సినిమా పూర్త‌యితే.. మే వ‌ర‌కూ సినిమాని ఆపాల్సిన అవ‌స‌రం లేదు. అందుకే… కాస్త ముందుకే తెచ్చే అవ‌కాశాలున్నాయి. బొమ్మ‌రిల్లు భాస్క‌ర్ అయితే.. ఏప్రిల్ లో సినిమాని తీసుకొచ్చేద్దాం.. అంటున్నాడ‌ట‌. కానీ అల్లు అర‌వింద్ మాత్రం సినిమా ఆల‌స్య‌మైనా ఫ‌ర్వాలేదు, అన్ని ర‌కాలుగా సంతృప్తి ప‌డిన త‌ర‌వాతే.. విడుద‌ల చేయాలి అంటున్నార్ట‌. మ‌రి ఏం జ‌రుగుతుందో చూడాలి.