మ‌న‌సంతా నువ్వే, వ‌ర్షం చిత్రాల‌తో తెలుగు ప్రేక్ష‌కులను మెప్పించి – త‌న‌కంటూ ఓ బ్రాండ్ ఇమేజ్ ని సంపాదించుకున్నారు ఎం.ఎస్. రాజు. ఆ త‌ర‌వాత ద‌ర్శ‌కుడిగా మారారు. ద‌ర్శ‌కుడిగా విజ‌యాలేం సాధించ‌క‌పోయినా – ఫ్యామిలీ బ్రాండ్ అయితే కొన‌సాగించారు. ఆయ‌న క‌థ‌లు, తీసిన సినిమాలూ అన్నీ ప‌ద్ధ‌తిగా ఉంటాయి. అయితే తొలిసారి రాజుగారు గీత దాటారేమో అనిపిస్తోంది. `డర్టీ హ‌రి` పోస్ట‌ర్లు చూస్తుంటే.

శ్రవణ్ రెడ్డి , సిమ్రత్ కౌర్, రుహాణి శర్మ ప్ర‌ధాన పాత్ర‌లు పోషించిన చిత్ర‌మిది. ఎంఎస్. రాజు ద‌ర్శ‌కుడు. ఇదో రొమాంటిక్ థ్రిల్లర్. మన నిత్యం క‌లిసే మనుషుల్లో దాగి ఉండే ఆటవికత్వం, విచక్షనారహిత్యం వంటి అంశాల చుట్టూ క‌థ న‌డుస్తుందని, క‌ఠోర‌మైన వాస్త‌వాల‌ను ఈ సినిమాలో చూపించామ‌ని రాజు అంటున్నారు. అయితే పోస్ట‌ర్లు, అందులో హీరో, హీరోయిన్లు పెట్టుకుంటున్న లిప్ లాక్కులు చూస్తుంటే సిని‌మా అంతా హాట్ హాట్ గా ఉండ‌బోతోంద‌న్న సంగ‌తి అర్థ‌మ‌వుతోంది. సినిమాలో చూడా చాలా సంద‌ర్భాల్లో, స‌న్నివేశాల్లో రాజుగారు గీత దాటేశార్ట‌. రేపు అంటే.. శ‌నివారం ఉద‌యం 11 గంట‌ల‌కు ట్రైల‌ర్ విడుద‌ల చేస్తున్నారు. అది చూస్తే.. విష‌యం అర్థ‌మైపోతుంది. ఈ సినిమాని ఓటీటీలో విడుద‌ల చేయ‌డానికి స‌న్నాహాలు చేస్తున్న‌ట్టు టాక్‌.