అటు పెద్ద హీరోలు ఇటు కాన్సెప్ట్ సినిమాలతో అడుగుపెట్టిన కొన్నాళ్ళుకే టాప్ ప్రొడక్షన్ సంస్థగా మారింది మైత్రీ మూవీ మేకర్స్. మరోపక్క డిస్ట్రిబ్యూషన్ ని కూడా మొదలుపెట్టింది. ఈ మధ్య కాలంలో డిస్ట్రిబ్యూషన్ జోరు మరింతగా పెంచింది. గత వారమే విజయ్ ‘గోట్’ విడుదల చేశారు. ఈ వారం ఏకంగా మూడు సినిమాలు మైత్రీ మూవీ మేకర్స్ నుంచి వస్తున్నాయి.

‘మత్తువదలరా’కి సీక్వల్ గా ‘మత్తువదలరా 2’ని ప్రేక్షకుల ముందుకు తీసుకొస్తున్నారు. మంచి బజ్ వున్న సినిమా ఇది. ప్రమోషన్స్ కూడా బావున్నాయి. కామెడీ వర్క్ అవుట్ అయితే మైత్రీ ఖాతాలో మరో విజయం పడినట్లే.

మలయాళం స్టార్ హీరో టోవినో థామస్ నటించిన “ఏఆర్ఎం”సినిమా మైత్రీ చేతికి వెళ్ళింది. ఫాంటసీ జోనర్ త్రీడీ సినిమా ఇది. ట్రైలర్ లో విజువల్స్ కంటెంట్ ఆకట్టుకొనేలా వుంది. థియేటర్స్ లో చూడదగ్గ సినిమా అనే అభిప్రాయం ట్రైల‌ర్‌ కలిగించింది. మిన్నల్ మురళి, 2018 సినిమాలతో టోవినో థామస్ తెలుగు ప్రేక్షకులకు దగ్గరయ్యాడు. సినిమాకి హిట్ టాక్ వస్తే గనుక టికెట్లు తెగే అవకాశం పుష్కలంగా వుంది.

‘ఉత్సవం’ అనే మరో సినిమా ఈ వారం ప్రేక్షకుల ముందుకు తీసుకొస్తుంది మైత్రీ. దిలీప్ ప్రకాష్ హీరోగా నటించిన సినిమా ఇది. రంగస్థలం నేపధ్యంలో తెరకెక్కిన ఈ సినిమాలో రెజీనా, ప్రకాష్ రాజ్, నాజర్, బ్రహ్మానందం ఇలా పెద్ద తారాగణమే వుంది. ఫీల్ గుడ్ సినిమా ఇది. మైత్రీ మూవీ మేకర్స్ రిలీజ్ తో ఇంకాస్త ఎటెన్షన్ వచ్చింది. మొత్తానికి ఈ వారం మూడు సినిమాలతో సందడి చేస్తున్నారు మైత్రీ మూవీ మేకర్స్. మరి ఇందులో మైత్రీకి లాభాల పంట పండించే సినిమా ఎదో చూడాలి.