ఈ సంక్రాంతికి నాగార్జున ‘నా సామి రంగ‌’తో ప్రేక్ష‌కుల్ని ప‌ల‌క‌రించ‌బోతున్నాడు. ఇందులో అల్ల‌రి న‌రేష్‌, రాజ్ త‌రుణ్ లు కీల‌క పాత్ర‌లు పోషిస్తున్న సంగ‌తి తెలిసిందే. జ‌న‌వ‌రి 14న వ‌స్తోంది. ఈరోజుతో షూటింగ్ కూడా పూర్త‌యిపోయింది. ఒక‌ట్రెండు రోజుల్లో సెన్సార్ ముందుకు వెళ్తుంది. ‘నా సామి రంగ‌’ మ‌ల‌యాళంలో హిట్ట‌యిన ‘పొరింజు మ‌రియ‌మ్ జోస్‌’కి రీమేక్‌. అయితే ఈ విష‌యాన్ని ఇప్ప‌టి వ‌ర‌కూ చిత్ర‌బృందం అధికారికంగా వెల్ల‌డించ‌లేదు. అయితే ఈరోజు ద‌ర్శ‌కుడు బిన్నీ మాత్రం దీనిపై క్లారిటీ ఇవ్వాల్సివ‌చ్చింది. ఈ సినిమా రీమేక్ అని ఒప్పుకొన్నారు. అయితే క‌థ‌లో పాయింట్ మాత్ర‌మే తీసుకొన్నామ‌ని, క‌థ‌నంలో మార్పులు ఎక్కువ‌గా జ‌రిగాయ‌ని చెప్పారాయ‌న‌.

”నేను స్వ‌త‌హాగా కొరియోగ్రాఫ‌ర్‌ని. ద‌ర్శ‌క‌త్వం చేయాలన్న‌ది నా క‌ల‌. ఓ క‌థ‌తో నాగార్జున ద‌గ్గ‌ర‌కు వెళ్లాను. అప్పుడు ఆయ‌న ఈ క‌థ వినిపించారు. దాన్ని నా స్టైల్ లో తీర్చిదిద్దా” అని చెప్పుకొచ్చాడు ఈ కొత్త ద‌ర్శ‌కుడు. ఈ సినిమాలో న‌రేష్‌కీ, రాజ్ త‌రుణ్‌నీ తీసుకోవాల‌న్న‌ది కూడా నాగ్ ఆలోచ‌న‌నే అట‌. ఈ సినిమాలో 5 పాట‌లు ఉంటే 4 పాట‌ల‌కు బిన్నీనే కొరియోగ్ర‌ఫీ కూడా అందించారు. అప్ప‌ట్లో లారెన్స్‌ని కూడా నాగ్ ద‌ర్శ‌కుడి మార్చి హిట్ అందించారు. మ‌రి ఇప్పుడు బిన్నీ కెరీర్ ఎలా సాగుతుందో చూడాలి.