ఈ సంక్రాంతి బ‌రిలో నాగార్జున సినిమా కూడా చేరిపోయింది. విజే బిన్నీ ద‌ర్శ‌క‌త్వంలో నాగార్జున క‌థానాయ‌కుడిగా `నా సామిరంగ‌` రూపుదిద్దుకొంటోంది. ఇదో మ‌ల‌యాళీ రీమేక్‌. ఈ చిత్రాన్ని 2024 సంక్రాంతికి విడుద‌ల చేస్తున్నారు. ఈరోజు నాగార్జున పుట్టిన రోజు. ఈ సంద‌ర్భంగా కొత్త సినిమాకి సంబంధించిన టైటిల్ ప్ర‌క‌టించ‌డంతో పాటు ఓ గ్లింప్స్ కూడా వ‌దిలారు. ఓ షెడ్డులో వంద‌ల మంది ఫైట‌ర్ల‌తో నాగ్ త‌ల‌ప‌డే దృశ్యాలు… ఈ క‌థ‌లోని మాస్ ఇంటెన్స్‌కి అద్దం ప‌డుతున్నాయి. నాగ్ లుక్‌.. కొత్త‌గా అనిపిస్తోంది. నాగ్ ఎంట్రీ, బీడీ వెలిగించిన విధానం.. ఇవ‌న్నీ మ‌హా మాస్ గా అనిపించాయి. దాంతో పాటు కీర‌వాణి `జాత‌ర‌.. జాత‌ర‌` అంటూ ఇచ్చిన‌ బ్యాక్ గ్రౌండ్ స్కోర్ మ్యాజిక్ చేస్తోంది. కాజ‌ల్ ని క‌థానాయిక‌గా ఎంచుకొనే అవ‌కాశాలు ఉన్నాయి. ప్ర‌స‌న్న కుమార్ బెజ‌వాడ ఈ చిత్రానికి స్క్రీన్ ప్లే, సంభాష‌ణ‌లు అందించారు. సంక్రాంతి సీజ‌న్ నాగ్ కి బాగానే క‌లిసొచ్చింది. ఈ సీజ‌న్‌లో విడుద‌లైన సోగ్గాడే చిన్ని నాయిన‌, బంగార్రాజు చిత్రాలు బాగా ఆడాయి. అందుకే ఈసారి కూడా ముగ్గుల పండ‌క్కే గురి పెట్టారు.