నాగ‌చైత‌న్య‌, స‌మంత‌ల‌ది సూప‌ర్ హిట్ కాంబినేష‌న్‌. ఏమాయ చేశావేతో ఇద్ద‌రూ తొలి హిట్ అందుకొన్నారు. ఆ త‌ర‌వాత ఆటోన‌గ‌ర్ సూర్య నిరాశ ప‌రిచినా.. అందులోనూ వాళ్లిద్ద‌రి కెమిస్ట్రీ అదిరిపోయింది. మ‌నంలో మ‌ళ్లీ జోడీగా క‌నిపించి మ‌రో హిట్ అందుకొన్నారు. ఇప్పుడు మ‌రోసారి వీరిద్ద‌ర్నీ వెండి తెర‌పై ఒకేసారి చూసే అవ‌కాశం ద‌క్క‌బోతోంది. నాగ‌చైత‌న్య – క‌ల్యాణ్ కృష్ణ కాంబినేష‌న్‌లో ఓ చిత్రం తెర‌కెక్కుతోంది. వ‌చ్చే నెల‌లో ఈ సినిమా సెట్స్‌పైకి వెళ్ల‌బోతోంది. ఇందులో క‌థానాయిక‌గా స‌మంత‌ని ఎంచుకొనేందుకు ప్ర‌య‌త్నాలు జ‌రుగుతున్నాయి.

అయితే వ‌రుస సినిమాల‌తో స‌మంత బిజీ బిజీగా ఉంది. ఈ నేప‌థ్యంలో కాల్షీట్లు స‌ర్దుబాటు చేయ‌గ‌ల‌దా? అనే అనుమానాలు వ్య‌క్తం అవుతున్నాయి. అన్న‌పూర్ణ కాంపౌండ్ నుంచి వ‌చ్చిన ఆఫ‌ర్ అంటే.. స‌మంత అస్స‌లు వ‌దులుకోదు. అందుకే… ఈ సినిమాకి ఓకే చెప్పే అవ‌కాశాలే క‌నిపిస్తున్నాయి. సోగ్గాడే చిన్నినాయిన త‌ర‌వాత క‌ల్యాణ్ కృష్ణ డైరెక్ట్ చేసే సినిమా కాబ‌ట్టి దీనిపై భారీ అంచ‌నాలున్నాయి. చైతూకి ఓ క‌మర్షియ‌ల్ హిట్ అందించే క‌థ‌ని క‌ల్యాణ్ కృష్ణ సిద్ధం చేశాడ‌ట‌. ఈ సినిమా అయ్యాక‌.. నాగ్‌తోనే సోగ్గాడే చిన్నినాయిన కి సీక్వెల్‌గా బంగార్రాజు చేయ‌నున్నాడు క‌ల్యాణ్ కృష్ణ‌. సో.. వ‌రుస‌గా మూడు సినిమాల పాటు అన్న‌పూర్ణ స్టూడియోస్‌తోనే ప్ర‌యాణిస్తాడ‌న్న‌మాట‌.