శ‌ర్వానంద్ కొత్త సినిమా `ఒకే ఒక జీవితం` మ‌రో రెండ్రోజుల్లో థియేట‌ర్ల‌లో రాబోతోంది. ఈ సినిమాపై శ‌ర్వాకి చాలా గురి. అందుకే ముందే ప్రీమియ‌ర్ల‌ని ఏర్పాటు చేశాడు. మంగ‌ళ‌వారం రాత్రి సినీ సెల‌బ్రెటీల కోసం ఓ ప్ర‌త్యేకమైన షో వేశాడు. ఈ షోకి నాగార్జున‌, అఖిల్ లు కూడా హాజ‌ర‌య్యారు. చాలా కాలం త‌ర‌వాత అమ‌ల ఈ సినిమాలో న‌టించిన సంగ‌తి తెలిసిందే. అందుకే నాగ్ కి ఈ సినిమా అంటే స్పెష‌ల్ బాండింగ్ ఏర్ప‌డింది. ఈ సినిమా చూశాక‌… నాగ్ క‌న్నీటి ప‌ర్యంతం అయ్యారు. ముఖ్యంగా అమ‌ల – శ‌ర్వాల మ‌ధ్య బాండింగ్, వాళ్ల మ‌ధ్య సీన్‌…. మ‌న‌సుల్ని హ‌త్తుకొనేలా తెర‌కెక్కించాడ‌ట‌. అమ‌ల‌ని ఇలాంటి ఉదాత్త‌మైన‌పాత్రలో చూసిన నాగ్ చ‌లించిపోయార‌ని, థియేట‌ర్లో కొన్ని స‌న్నివేశాల‌కు కంట‌త‌డి పెట్టుకొన్నార‌ని తెలుస్తోంది. షో అయ్యాక‌.. చాలాసేపు శ‌ర్వాతో మాట్లాడారు నాగ్‌. మారుతి, హ‌ను రాఘ‌వ‌పూడి, వ‌శిష్ట‌.. వీళ్లంతా ఈ స్పెష‌ల్ షోకి హాజ‌ర‌య్యారు.

టైమ్ మిష‌న్ నేప‌థ్యంలో చాలా సినిమాలొచ్చాయి. అయితే వాటిలో లేని యునిక్ పాయింట్ `ఒకే ఒక జీవితం`లో క‌నిపించ‌నుంది. ఓ సైన్స్ ఫిక్ష‌న్‌కి అమ్మ సెంటిమెంట్ జోడించి తెర‌కెక్కించాడు ద‌ర్శ‌కుడు. ఇలా రెండు విభిన్న‌మైన జోన‌ర్ల‌ని మేళ‌వించ‌డం కొత్త‌ర‌కం కాన్సెప్టు అనుకోవాలి. థియేట‌ర్లో మంచి ఎమోష‌న‌ల్‌, ఫీల్ గుడ్ మూవీ చూసి చాలా రోజులైంది. మ‌రి… `ఒకే ఒక జీవితం` ఆలోటు ఎంత వ‌ర‌కూ భ‌ర్తీ చేస్తుందో చూడాలి.