రాజమౌళి దర్శకత్వంలో విడుదలయిన బాహుబలి సినిమాని చూసి నటీ నటులందరూ అటువంటి సినిమాలో నటించే అవకాశం తమకు దక్కనందుకు చాలా బాధపడుతున్నారు.అన్నమయ్య, రామదాసు, షిరిడి సాయి వంటి అనేక సినిమాలలో నటించి మెప్పించిన నాగార్జున కూడా బాహుబలి సినిమాలో తనకి అవకాశం రానందుకు బాధపడుతున్నాని చెప్పారు. మహాభారతంసినిమా తీయడమే తన కల అని దర్శకుడు రాజమౌళి ఇటీవల బయటపెట్టారు. మరి నాగార్జున ఆ మాట విన్నారో లేక యాదృచ్చికంగా అన్నారో తెలియదు కానీ తనకు తన తండ్రి స్వర్గీయ అక్కినేని నాగేశ్వర రావు, స్వర్గీయ ఎన్టీఆర్ నటించిన పౌరాణిక చిత్రాలంటే చాలా ఇష్టమని, తనకు ఎప్పటికయినా అటువంటి పౌరాణిక పాత్రలు చేయాలని ఆశాపడుతున్నానని అన్నారు.
ఒకవేళ రాజమౌళి త్వరలో మహాభారతం సినిమా తీసినట్లయితే అందులో తనకీ అవకాశం ఇస్తే సంతోషిస్తానని చేపుతున్నట్లే ఉంది నాగార్జున మాటలు వింటే. అన్నమయ్య, రామదాసు వంటి సినిమాలతో ఇప్పటికే తన సత్తా చాటుకొన్న నాగార్జునకి పౌరాణిక పాత్రలు అవలీలగానే చేసి మెప్పించగలదని భావించవచ్చును. దర్శకుడు రాజమౌళి ఆయన అభ్యర్ధనను మన్నిస్తారో లేదో తెలియదు కానీ నాగార్జున చెప్పిన ఈ మాటతో ఆయన మహాభారతంలో ఆయన ఏ పాత్రకి సరిపోతారో ఆలోచించడానికి అవకాశం కల్పించారు.
