నాగార్జున లెక్క‌ల‌న్నీ వేరుగా ఉంటాయి. త‌న‌కు హిట్టూ, ఫ్లాపుల‌తో సంబంధం ఉండ‌దు. కాన్సెప్ట్ న‌చ్చితే… భుజం త‌ట్టి ప్రోత్స‌హిస్తుంటాడు. అలా చాలామంది ద‌ర్శ‌కుల‌కు అవ‌కాశాలిచ్చాడు. ఇప్పుడు రాహుల్ ర‌వీంద్ర‌న్ కి నాగ్ మ‌రో ఛాన్స్ ఇచ్చాడు. చిల‌సౌతో త‌న‌లోనూ ఓ ద‌ర్శ‌కుడు ఉన్నాడ‌ని నిరూపించుకున్నాడు రాహుల్ ర‌వీంద్ర‌న్‌. ఆ వెంట‌నే నాగార్జున‌తో క‌లిసి ప‌నిచేసే అవ‌కాశం వ‌చ్చింది. రాహుల్ ని న‌మ్మి నాగ్ ఓ ఛాన్స్ ఇచ్చాడు. త‌న‌కు ఇష్ట‌మైన `మ‌న్మ‌థుడు` టైటిల్ నీ పెట్టుకునే ఛాన్స్ ఇచ్చాడు. అయితే `మ‌న్మ‌థుడు 2` డిజాస్ట‌ర్ అయ్యింది. ఆ తర‌వాత రాహుల్ క‌నిపించ‌కుండా పోయాడు.

అయితే ఇప్పుడు మ‌ళ్లీ అన్న‌పూర్ణ స్టూడియోస్‌తో రాహుల్ ఓ సినిమా చేయ‌బోతున్నాడ‌ట‌. అందుకు స‌న్నాహాల‌న్నీ పూర్త‌య్యాయ‌ని టాక్‌. అయితే ఇందులో నాగార్జున హీరో కాదు. అక్కినేని హీరోలెవ‌రూ క‌నిపించ‌రు. పూర్తిగా కొత్త‌వాళ్ల‌తో రాహుల్ ఈ ప్ర‌య‌త్నం చేస్తున్నాడ‌ని తెలుస్తోంది. చిల‌సౌ లానే ఓ కొత్త త‌ర‌హా ప్రేమ‌క‌థ‌ని రాహుల్ తెర‌పై చూపించ‌బోతున్నాడ‌ట‌. అన్న‌పూర్ణ స్టూడియోస్ ఈ సినిమాని నిర్మించ‌బోతోంది. పూర్తి వివ‌రాలు త్వ‌ర‌లో తెలుస్తాయి.