బిగ్ బాస్ 3 సీజ‌న్‌కి హోస్ట్ ఎవ‌రో తెలిసిపోయింది. ఆ ఛాన్స్ నాగార్జునకి ద‌క్కింది. తొలి సెష‌న్‌ని ఎన్టీఆర్, రెండో సీజ‌న్‌ని నాని న‌డిపించిన సంగ‌తి తెలిసిందే. ఎన్టీఆర్ రాజ‌మౌళి సినిమాతో బిజీ అయిపోయాడు. ‘ఇక నేను బిగ్ బాస్ లో క‌నిపించ‌ను’ అని నాని తెగేసి చెప్పేశాడు. వెంకీ, రానా, విజ‌య్‌దేవ‌ర‌కొండ లాంటి పేర్ల‌ని బిగ్ బాస్ బృందం ప‌రిశీలించింది. చివ‌రికి నాగార్జున‌ని ఖాయం చేసేసింది. నాగ్‌కి `మీలో ఎవ‌రు కోటీశ్వ‌రుడు`తో బుల్లి తెర ట‌చ్‌లోకి వెళ్లిపోయింది. ఆ షోని నాగ్ బాగానే హ్యాండిల్ చేశాడు. పైగా `మా` టీవీతో నాగ్‌ది ప్ర‌త్యేక‌మైన అనుబంధం. అందుకే… ఈ షో నాగార్జున చేతుల్లో పెట్టేశారు. నాగ్ ప్ర‌స్తుతం `మ‌న్మ‌థుడు 2` షూటింగ్ బిజీలో ఉన్నారు. పోర్చుగ‌ల్‌లో షెడ్యూల్ జ‌రుగుతోంది. అక్క‌డి నుంచి నాగ్ తిరిగొచ్చాక‌.. ఎగ్రిమెంట్ల‌పై సంత‌కాలు చేస్తారు. ఆ త‌ర‌వాత‌.. అఫీషియ‌ల్‌గా నాగ్ పేరుని బిగ్ బాస్ బృందం ప్ర‌క‌టించ‌బోతోంది. తొలి సీజ‌న్‌లో ఎన్టీఆర్ దాదాపు 9 కోట్ల వ‌ర‌కూ పారితోషికం అందుకున్నాడు. ఆ త‌ర‌వాత‌.. నానికి ఆరు కోట్ల వ‌ర‌కూ ద‌క్కింది. నాగ్ ఎంత తీసుకుంటాడో చూడాలి మ‌రి.