నాగార్జున మ‌న‌సు మ‌ల్టీస్టార‌ర్ల‌వైపు మ‌ళ్లింది. ఇప్పుడాయ‌న చేతిలో రెండు మ‌ల్టీస్టార‌ర్లు ఉన్నాయి. వాటిలో ‘కుబేర’ ఒక‌టి. శేఖ‌ర్ క‌మ్ముల ద‌ర్శ‌క‌త్వంలో రూపొందుతున్న చిత్ర‌మిది. ధ‌నుష్ క‌థానాయ‌కుడు. ఇందులో నాగార్జున కీల‌క పాత్ర పోషిస్తున్న సంగ‌తి తెలిసిందే. ఇందులో నాగ్ పాత్ర ఏమిట‌న్న విష‌యం చిత్ర‌బృందం సస్పెన్స్ లో పెట్టింది. ఈరోజు హైద‌రాబాద్ – రాజ‌స్థాన్ మ‌ధ్య ఐపీఎల్ మ్యాచ్ జ‌ర‌గ‌బోతున్న సంగ‌తి తెలిసిందే. హైద‌రాబాద్ వేదిక‌గా జ‌ర‌గే ఈమ్యాచ్ కామెంట‌రీ బాక్స్ లో నాగార్జున ప్ర‌త్య‌క్షం కానున్నారు. ‘కుబేర’లో నాగ్ లుక్ అక్క‌డే విడుద‌ల చేయ‌బోతున్నారు. నాగ్ లుక్ తో పాటుగా ఆయ‌న పాత్ర‌కు సంబంధించిన ఓ స‌ర్‌ప్రైజ్‌ని ఇక్క‌డ రివీల్ చేయ‌బోతున్నారు.
‘కుబేర’లో నాగ్ ఈడీ ఆఫీస‌ర్‌గా క‌నిపించ‌బోతున్నార‌ని తెలుస్తోంది. ఆ విష‌యాన్నే ఈరోజు రివీల్ చేసే అవ‌కాశం ఉంది. ఓ అనామ‌కుడు ఎలా అప‌ర కోటీశ్వ‌రుడిగా మారాడ‌న్న‌దే ఈ సినిమా క‌థ. మాఫియా నేప‌థ్యంలో ఈ క‌థ న‌డ‌వ‌బోతోంది. శేఖ‌ర్ క‌మ్ముల సినిమాల‌న్నీ క్లాసీగా ఉంటాయి. అయితే తొలిసారి మాస్‌, యాక్ష‌న్ క‌థ‌ని ఎంచుకోవ‌డం ఆయ‌న అభిమానుల్ని ఆశ్చ‌ర్యంలో పడేస్తోంది. ర‌ష్మిక క‌థానాయిక. రెహ‌మాన్ సంగీతాన్ని అందిస్తున్నారు.
