కృష్ణ వంశీ సినిమా అన‌గానే ఏదో ఓ స‌మ‌స్య చుట్టు ముట్ట‌డం ఆన‌వాయితీ అయిపోయింది. పైసా విడుద‌ల‌కు ముందు అష్ట‌క‌ష్టాలూ ప‌డింది. ఇప్పుడు న‌క్ష‌త్రంకీ అదే సీన్ రిపీట్ అవుతోందా?? అనే అనుమానాలు వ్య‌క్తం అవుతున్నాయి. ఎన్నో సాధ‌క బాధ‌కాలు భ‌రిస్తూ… న‌క్ష‌త్రం సినిమా పూర్తి చేశాడు కృష్ణ‌వంశీ. ఈనెల 28న ఈ సినిమా ప్రేక్ష‌కుల ముందుకు రానుంది. చిత్ర‌బృందం విడుద‌ల తేదీ కూడా ప్ర‌క‌టించింది. అయితే 28న ఈ సినిమా వ‌స్తుందా, రాదా? అనే అనుమానాలు వ్య‌క్తం అవుతున్నాయి. 28న ఈ సినిమా విడుద‌ల కావ‌డం క‌ష్ట‌మ‌న్న‌ది ఫిల్మ్‌న‌గ‌ర్ వ‌ర్గాల మాట‌. ఈ సినిమా ఆర్థిక ఇబ్బందుల్లో ఉంద‌ని, బిజినెస్ కూడా అంతంత మాత్రంగా జ‌రిగింద‌ని చెబుతున్నారు. పైగా ఆ రోజున ‘గౌత‌మ్ నంద‌’ విడుద‌ల అవుతోంది. అదే రోజున `వీఐపీ 2` కూడా విడుద‌లయ్యే అవ‌కాశాలున్నాయి. వీటి మ‌ధ్య కృష్ణ‌వంశీ చిత్రాన్ని విడుద‌ల చేయ‌డానికి బ‌య్య‌ర్లు ఆలోచిస్తున్నార్ట‌. అందుకే న‌క్ష‌త్రం విడుద‌ల తేదీ వాయిదా ప‌డే అవ‌కాశాలున్నాయ‌ని తెలుస్తోంది. ఒక‌ట్రెండు రోజుల్లో కొత్త రిలీజ్ డేట్ బ‌య‌ట‌కు రావొచ్చు.