తెలంగాణలో నమస్తే తెలంగాణ, సాక్షి పత్రికలు జిల్లా టాబ్లాయిడ్లను పోటాపోటీగా ప్రారంభించాయి. తెలంగాణలో ప్రింట్ మీడియా జోరందుకుంటోంది. ఖర్చులు పెట్టుకుని అయినా మార్కెట్ పెంచుకునేందుకు పత్రికలు పోటీ పడుతున్నాయి. అయితే అన్నీ కాదు.. పత్రిక మీద కాకండా.. ఇతరత్రా ఆదాయాలు..అదీ కూడా.. అధికారం అండ ఉన్న వారి పత్రికలు మాత్రమే దూకుడుగా ఉన్నాయి. కరోనా దెబ్బ కొట్టిన తర్వాత జిల్లా టాబ్లాయిడ్లను మెయిన్‌లో కలిపేసి.. ఒకటి లేదా.. రెండు స్లిప్ పేజీలకు పరిమితం చేసిన యాజమాన్యాలు ఇప్పుడు.. మళ్లీ టాబ్లాయిడ్లను తీసుకు వచ్చాయి. సాక్షి, నమస్తే తెలంగాణ రెండూ ఆదివారం నుంచి జిల్లా అనుబంధాలు ఇస్తున్నాయి. తెలంగాణలో ఎక్కువ జిల్లాలున్నాయి. అయినా ఈ రెండు పత్రికలు వెనక్కి తగ్గలేదు.
మొదట నమస్తే తెలంగాణ టాబ్లాయిడ్ నిర్ణయం తీసుకుంది. తర్వాత సాక్షి కూడా అనుసరించింది. ఈ రెండూ… రెండు రాష్ట్రాల్లోని అధికార పార్టీ నేతలకు చెందినవి కావడంతో.. వాటికి దాదాపుగా నిధుల సమస్య లేదు. నమస్తే తెలంగాణలో నిధుల సమస్య అంటూ జీతాలు కత్తిరించినప్పటికీ.. తర్వాత కేసీఆర్ జోక్యంతో తిరిగి ఇచ్చేశారు. సాక్షిలో అసలు జీతాల కత్తిరింపు ఆలోచనే చేయలేదు. అలాగని వాటికి ఆర్థిక సమస్యలు లేకపోలేదు. ఆదాయం పూర్తిగా పడిపోయింది. కానీ అధికార దన్ను ఉంది కాబట్టి.. సాక్షిలో కొన్ని ఫుల్ పేజీ ప్రకటనలు బాగానే కనిపించాయి. నమస్తే తెలంగాణకూ అంతే. అంతే.. ఇప్పుడు టాబ్లాయిడ్లు పెంచిన వారికి పెద్ద ఖర్చేమీ కాదు. న్యూస్ ప్రింట్ ఖర్చు తప్ప.
అయితే.. ఇప్పుడు ఇతర పత్రికలు ఈ భారాన్ని మోయడానికి సిద్ధంగా లేవు. ఆ పత్రికలు ఇస్తున్నాయి కాబట్టి.. అగ్ర దినపత్రిక ఈనాడుపై ఒత్తిడి పెరగక మానదు. ఆ పత్రిక కూడా.. ఈ వారంలో నిర్ణయం తీసుకోవచ్చు. ఆంధ్రజ్యోతి ఏం చేస్తుందనేది ఆసక్తికరం. ఆ ఖర్చును భరించడానికి సిద్ధపడుతుందో లేదో చూడాలి..!
