నంద‌మూరి బాల‌కృష్ణ న‌ట వార‌సుడు మోక్ష‌జ్ఞ సినీ రంగ ప్ర‌వేశం ఎప్పుడు?? ఈ విష‌యంపై నంద‌మూరి అభిమానులు ఎప్ప‌టి నుంచో ఆస‌క్తిక‌రంగా చ‌ర్చించుకొంటున్నారు. బాల‌య్య వందో సినిమాగా ఆదిత్య 369కి సీక్వెల్ వ‌స్తే, అందులో మోక్ష‌జ్ఞ యువ‌రాజుగా క‌నిపిస్తాడ‌ని వార్త‌లొచ్చాయి. అయితే బాల‌య్య వందో సినిమా నుంచి సింగీతం డ్రాప్ అవ్వ‌డం ఆ ప్లేసులో క్రిష్ రావ‌డం వందో సినిమా మొద‌లైపోవ‌డం కూడా చ‌క చ‌క జ‌రిగిపోయాయి. దాంతో బాల‌య్య వందో సినిమాతో మోక్ష‌జ్ఞ ఎంట్రీ చూడ‌లేక‌పోతున్నామ‌ని కుసింత ఫీలయ్యారు నంద‌మూరి ఫ్యాన్స్.
అయితే గౌత‌మి పుత్ర శాత‌క‌ర్ణిలో ఆ లోటు తీర‌బోతోంది. ఈసినిమాలో మోక్ష‌జ్ఞ ప‌నిచేయ‌నున్నాడు. అయితే న‌టుడిగా కాదు. ఓ సహాయ ద‌ర్శ‌కుడిగా. అవును గౌత‌మిపుత్ర కి మోక్ష‌జ్ఞ అసిస్టెంట్ డైరెక్ట‌ర్‌గా ఎంట్రీ ఇవ్వ‌బోతున్నాడు. 2017లో మోక్ష‌జ్ఞ క‌థానాయ‌కుడిగా రంగ ప్ర‌వేశం చేయ‌డం దాదాపుగా ఖాయ‌మైపోయింది. ఈలోగా సినిమా వాతావ‌ర‌ణం అల‌వాటు ప‌డ‌డానికి బాల‌య్య ఈ నిర్ణ‌యం తీసుకొన్నాడ‌ని తెలుస్తోంది. ఈనెల 9న మొరాకోలో బాల‌య్య సినిమా ప్రారంభం కానుంది. ఆ టీమ్‌తో… మోక్ష‌జ్ఞ కూడా వెళ్ల‌బోతున్నాడ‌ట. అలా.. బాల‌య్య వందో సినిమాలో తానూ భాగం పంచుకోబోతున్నాడు. నంద‌మూరి ఫ్యాన్స్‌కి ఇంత‌కంటే తీపి వార్త ఇంకేం ఉంటుంది?
