తెలుగులో ప్ర‌తిభావంతులైన మ‌హిళా ద‌ర్శ‌కుల్లో నందినిరెడ్డి పేరు ముందు వ‌రుస‌లోనే ఉంటుంది. ‘అలా మొద‌లైంది’, ‘ఓ బేబీ’ లాంటి మంచి హిట్స్ ఆమె ఖాతాలో ఉన్నాయి. ‘అన్నీ మంచి శ‌కున‌ములే’ త‌ర‌వాత మరో సినిమా ప‌ట్టాలెక్కించ‌లేదు. సిద్దు జొన్న‌ల‌గడ్డ‌తో ఓ సినిమా అనుకొన్నారు కానీ, అది వర్క‌వుట్ అవ్వ‌లేదు. ఇప్పుడు నెట్ ఫిక్స్ కోసం ఓ వెబ్ సిరీస్ చేసే ప‌నిలో ఉన్నార‌ని స‌మాచారం. లేడీ ఓరియెంటెడ్ స్క్రిప్టుని నందిని త‌యారు చేశార‌ని, అది నెట్ ఫ్లిక్స్ చేతికి వెళ్లింద‌ని, ఓ అగ్ర క‌థానాయిక‌గా ఈ వెబ్ సిరీస్‌లో న‌టించే అవ‌కాశాలు ఉన్నాయ‌ని తెలుస్తోంది.
స‌మంత‌తో నందినికి మంచి అనుబంధం ఉంది. ‘ఓ బేబీ’ వీరి కాంబోలో వ‌చ్చిన సినిమానే. స‌మీక‌ర‌ణాలు అన్నీ కుదిరితే.. ఈ ప్రాజెక్టు స‌మంత‌తోనే ఉండొచ్చు. స‌మంత లాంటి స్టార్ దొరికితే నందిని ఈ వెబ్ సిరీస్‌కు దర్శ‌క‌త్వం వ‌హిస్తారు. లేదంటే.. షో ర‌న్న‌ర్‌గా వ్య‌వ‌హ‌రిస్తారు. మ‌రోవైపు సినిమాకు త‌గిన ప్ర‌య‌త్నాలు కూడా నందిని జోరుగా సాగిస్తున్న‌ట్టు తెలుస్తోంది. ప్ర‌ముఖ నిర్మాణ సంస్థ‌ల కోసం ఆమె క‌థ‌లు రెడీ చేస్తున్నారు. అతి త్వ‌ర‌లోనే వెబ్ సిరీస్‌కు సంబంధించిన డిటైల్స్ బ‌య‌ట‌కు రానున్నాయి.
