నాని సినిమా అంటే వినోదం ఉండాల్సిందే. క‌థ అటూ ఇటూ తిరిగినా – ఎంటర్‌టైన్‌మెంట్ విష‌యంలో మాత్రం లోటు జ‌ర‌క్కూడ‌దు. కేవ‌లం వినోదాన్ని న‌మ్ముకుని గ‌ట్టెక్కిన సినిమాలు నాని ఖాతాలోనూ క‌నిపిస్తాయి. నేను లోక‌ల్‌, ఎంసీఏ అలాంటి క‌థ‌లే. ఇప్పుడు కృష్ణార్జున యుద్ధంలోనూ వినోదానికి ఢోకా లేకుడా చూస్తుకున్నాడట‌. అదే.. ఈసినిమాని నిల‌బెట్టేస్తుంద‌ని నాని ధీమాగా ఉన్నాడు. వ‌రుస హిట్ల‌మీద ఉన్న నాని నుంచి వ‌స్తున్న మ‌రో సినిమా ‘కృష్ణార్జున యుద్ధం’. నాని ఊపుమీద ఉండ‌డంతో పాటు, ఈ సినిమాని ప్ర‌పంచ వ్యాప్తంగా దిల్ రాజు విడుద‌ల చేస్తుండ‌డంతో ఈ సినిమాపై క్రేజ్ పెరిగింది. నానికెరీర్‌లో తొలిసారి యూఎస్‌లో 600 స్క్రీన్స్‌లలో ప్రీమియ‌ర్ ప‌డ‌బోతోంది. ”ఈ సినిమా చూశా. చాలా న‌మ్మ‌కంగా ఉన్నాను. ఇది వ‌ర‌క‌టి సినిమాల‌కంటే ఉన్న‌తంగా ఉంటుంది. ప్ర‌తీ సినిమా విడుద‌ల‌కు ముందు నాకు కొంచెం టెన్ష‌న్‌గా ఉంటుంది. ఆ ఒత్తిడి ఉండ‌కూడ‌ద‌నే ఎక్కువ సినిమాలు చేస్తుంటా. అయినా స‌రే… ఒత్తిడి వ‌ద‌ల‌డం లేదు“ అంటున్నాడు నాని. ఈ సినిమాపై దిల్‌రాజు కూడా పూర్తి న‌మ్మ‌కంతో ఉన్నాడు.”తొలి భాగం అంతా స‌ర‌దా స‌ర‌దాగా సాగిపోతుంది. నాని నుంచి ఆశించే వినోదం ఉంటుంది. ద్వితీయార్థంలో అస‌లైన క‌థ మొద‌ల‌వుతుంది” అంటూ ప్రేక్ష‌కుల్ని ముందే ప్రిపేర్ చేస్తున్నాడు.