మ‌ల్టీస్టార‌ర్ చిత్రాల‌కు చిరునామా.. వెంక‌టేష్‌. యువ‌త‌రం హీరోల్లో అలాంటి అభిరుచి ఉన్న క‌థానాయ‌కుడు నాని. వీరిద్ద‌రూ క‌లిస్తే ఎలా ఉంటుంది? రెండు త‌రాల‌కు స‌రిప‌డినంత వినోదం ఒక్క‌సారిగా చూసిన‌ట్టు అనిపిస్తుంది క‌దూ. వీరిద్ద‌రినీ క‌లిపి చూడాల‌న్న ఆలోచ‌న ద‌ర్శ‌క నిర్మాత‌ల‌కు ఇప్ప‌టి వ‌ర‌కూ వ‌చ్చిందో రాదో తెలీదు గానీ, ఇక మీద‌ట మాత్రం క‌చ్చితంగా వ‌స్తుంది. ఎందుకంటే… ఓ హీరో నుంచి ఈ మ‌ల్టీస్టార‌ర్‌కు గ్రీన్ సిగ్న‌ల్ వ‌చ్చేసింది. `వెంక‌టేష్ గారితో క‌ల‌సి ఓ మ‌ల్టీస్టార‌ర్ చేయాల‌నివుంది` అంటూ త‌న మ‌న‌సులోని మాట బ‌య‌ట‌పెట్టేశాడు నాని.

నాని క‌థానాయ‌కుడిగా న‌టించిన జెర్సీ ప్రీ రిలీజ్ ఫంక్ష‌న్ కొద్ది సేప‌టి క్రితం హైద‌రాబాద్ లో జ‌రిగింది. ఈ కార్య‌క్ర‌మానికి వెంక‌టేష్ ముఖ్య అతిథిగా వ‌చ్చాడు. ఈ సంద‌ర్భంలోనే నాని త‌న మ‌న‌సులో మాట బ‌య‌ట‌పెట్టాడు. వెంక‌టేష్ ఆవ‌కాయ లాంటివార‌ని, ఆయ‌న్ని ఇష్ట‌ప‌డ‌ని తెలుగువారు ఉండ‌ర‌ని వ్యాఖ్యానించాడు నాని. వెంక‌టేష్‌తో క‌ల‌సి న‌టించాల‌ని త‌న‌కు బ‌లంగా ఉంద‌ని, అలాంటి సినిమా కోసం తాను ఆస‌క్తిగా ఎదురుచూస్తున్నాన‌ని అన్నాడు. వెంకీ కూడా నానిని పొగ‌డ్త‌ల‌తో ముంచేశాడు. తెలుగు ప‌రిశ్ర‌మ‌లో ఉన్న అతి కొద్దిమంది స‌హ‌జ‌న‌టుల్లో నాని ఒక‌డ‌ని, సినిమా సినిమానీ తాను ఎదుగుతున్నాడ‌ని కితాబిచ్చాడు. సో.. వీరిద్ద‌రి మ‌ల్టీస్టార‌ర్ ని తెర‌పై చూడ్డానికి ఇంకెంతో కాలం ఆగ‌క్క‌ర్లేద‌న్న‌మాట‌.