వాల్ పోస్ట‌ర్ సినిమా అనే బ్యాన‌ర్‌ని స్థాపించి, బ‌య‌టి హీరోల‌తో సినిమాలు తీయాల‌ని నాని ఫిక్స‌యిన సంగ‌తి తెలిసిందే. అందులో భాగంగా ‘ఆ’ వ‌చ్చింది. ఈసినిమా విమ‌ర్శ‌కుల ప్ర‌శంస‌లు అందుకుంది. ఇప్పుడు రెండో సినిమా చేయ‌డానికి ఏర్పాట్లు చేస్తున్నాడు. ఇప్ప‌టికే ఓ క‌థ‌ని లాక్ చేశాడు. ఆ క‌థ‌కి స‌రిప‌డా హీరో కోసం అన్వేషిస్తున్నాడు. ఇప్పుడు ఆ హీరో దొరికేశాడు. త‌నే విశ్వ‌క్ సేన్‌. త‌రుణ్ భాస్క‌ర్ తెర‌కెక్కించిన ‘ఈ న‌గ‌రానికి ఏమైంది’ సినిమాతో హీరోగా ప‌రిచ‌యం అయ్యాడు విశ్వ‌క్ సేన్‌. ఇప్పుడు ‘ఫ‌ల‌క్ నుమా దాస్‌’తో ద‌ర్శ‌కుడిగానూ మారాడు. ఈ సినిమా ముందే చూసేశాడు నాని. అందులో విశ్వ‌క్ సేన్ న‌ట‌న‌కు ప‌డిపోయాడు. అందుకే.. త‌న త‌దుప‌రి సినిమాలో క‌థానాయ‌కుడిగా విశ్వ‌క్‌ని ఎంచుకున్నాడు. `ఫ‌ల‌క్‌నామా దాస్` ప్రీ రిలీజ్ ఫంక్ష‌న్‌కి నాని ముఖ్య అతిథిగా వ‌చ్చాడు. ఈ సంద‌ర్భంగా త‌న త‌దుప‌రి సినిమాలో హీరోగా విశ్వ‌క్‌ని ఎంచుకుంటున్న‌ట్టు వేదిక‌పై ప్ర‌క‌టించాడు నాని. త్వ‌ర‌లోనే ఈ సినిమాకి సంబంధించిన పూర్తి వివ‌రాలు బ‌య‌ట‌కు వ‌స్తాయి.